Túrkistandyq dıqandardyń ónimi ózge oblystarǵa da shyǵarylady
TÚRKІSTAN. QazAqparat – Keles aýdanynda ósirilgen qyryqqabattardy Shyǵys pen Soltústik Qazaqstan oblystarynyń turǵyndary da tutynatyn boldy, dep habarlaıdy QazAqparat tilshisi.
Qos oblystyń arnaıy ókilderi dıqandarmen kezdesip, erte pisetin jáne ashyq alqapta egilgen qyryqqabatty tıimdi baǵada satý-satyp alý boıynsha ortaq kelisimge keldi.
Atap aıtqanda, «Ertis» áleýmettik-kásipkerlik korporatsııasynyń» bas menedjeri Asqar Syzdyqov pen jeke kásipker Nurlan Saqpanov 200 tonna ónimge kelisimshart jasady. Al, Soltústik Qazaqstan oblysynyń ókilderi Alpamys batyr aýyldyq okrýgindegi seriktestikten qyryqqabattyń 150 tonnasyn satyp alatyn boldy.
Aıta keteıik, ótken jyly Túrkistan oblysynda 906,5 mlrd. teńgeniń aýyl sharýashylyǵy ónimi óndirildi. 845500 gektar jerge tuqym egilip, jospar 2100 gektarǵa artyǵymen oryndaldy. Egistikti ártaraptandyrýdyń nátıjesinde kókónis pen baqsha ónimderiniń túsimdiligi orta eseppen 50 tsentnerge kóbeıdi. Osylaısha, 3,3 mln. tonna kólemindegi rekordtyq kórsetkishke qol jetkizilgen bolatyn.
