Túrkistandyq dıqandar alǵashqy ónimderin ala bastady
TÚRKІSTAN. QazAqparat - Túrkistan oblysy Jetisaı aýdanynyń sharýalary bıylǵy alǵashqy ónimin ala bastady. Bul týraly óńir ákimdiginiń baspasóz qyzmetinen málim etti, dep habarlaıdy QazAqparat.
Qazirgi tańda Atameken aýyl okrýginde qańtar aıynda egilgen qyryqqabat jınalyp, Reseıge eksporttalýda. Túrkistan oblysy ákiminiń baspasóz qyzmeti uıymdastyrǵan press-týr kezinde BAQ ókilderi alǵashqy egistik alqapta bolyp, sharýalardyń jaı-kúıimen tanysty.
Jetisaılyq dıqandar bıylǵy sharýashylyq jumystardyń nátıjesi tabysty bastalǵanyn aıtýda.
«Qyryqqabatty 10 qańtar kúni ektik. Jabyndyny doǵa etip japtyq. Arnaıy dárýmenderin berdik. Qazir 40 adamnan astam adamdy jumyspen qamtyp otyrmyz. Qyryqqabattyń kelisi 210 teńgege baǵalanýda. Bul jetisaılyqtar úshin rekordtyq baǵa. 3 gektar jerge 80 myń túp Kevın jáne Faraon kóshetterin otyrǵyzdyq. Alǵashqy terimde-aq 20 tonna ónimdi Reseı memleketine jóneltip otyrmyz», - dedi «Yqylas» sharýa qojalyǵynyń tóraǵasy Arab Rátov.
Bıyl aýdanda kóktemgi dala jumystary qarqyndy. Qazirdiń ózinde 40 myń gektar jer jyrtylyp, 25 myńnan astam gektar jer qopsytyldy. Bıyl aýdan boıynsha 45 myń gektarǵa maqta shıtin sebý kózdelgen. Mamandar bıyl janar-jaǵarmaı men tyńaıtqyshtardan tapshylyq bolmaıtynyn aıtýda.
