Túrkistandyq dárigerler jańa týǵan shaqalaqqa kúrdeli ota jasady
TÚRKІSTAN. QazAqparat - Túrkistan oblystyq balalar aýrýhanasynyń kardıohırýrgtary júrek aqaýymen dúnıege kelgen sábıdi aman alyp qaldy. Alty saǵatqa sozylǵan kúrdeli otadan keıin sábı kardıohırýrgııa bólimine aýystyryldy, dep habarlaıdy QazAqparat.
Óńir ákimdiginiń baspasóz qyzmetinen málim etkendeı, týǵanyna nebári úsh kún bolǵan nárestege joǵary tehnologııalyq birneshe ota jasaldy. Sonyń biri – júrek tamyrlarynyń transpozıtsııasyn túzetý operatsııasy.
Sábıdiń salmaǵy nebári 2400 gramm. Náreste qalalyq Perınataldyq ortalyqtan sanavıatsııa jelisi boıynsha aýyr jaǵdaıda túsken. Oǵan quramynda kardıohırýrg, anestezıolog jáne perfýzıolog dárigerleri bar brıgada kúrdeli radıkaldy operatsııa jasady. Joǵary tehnologııalyq ota - týabitken júrek aqaýyn joıý úshin Lekompte manevrimen negizgi tamyrlardyń arterııalyq aýystyrylýy sátti aıaqtaldy.
«Dárigerlerdiń aıtýynsha, der kezinde jasalǵan otanyń arqasynda sábıdiń densaýlyǵy jaqsardy. Bala turǵylyqty jeri boıynsha ambýlatorııalyq baqylaýǵa shyǵaryldy. ODB jaǵdaıynda ońaltý emine daıyndalýda. Jyl basynan beri oblystyq balalar aýrýhanasynyń kardıohırýrgtary jańa týǵan nárestelerge osyndaı 6 ota jasady», - dep málim etti óńir ákimdiginiń baspasóz qyzmetinen.
Oblystyq Qoǵamdyq densaýlyq saqtaý basqarmasynyń málimetinshe, Túrkistan oblystyq balalar aýrýhanasynyń kardıohırýrgııa bólimshesinde jyl saıyn sábılerdiń ashyq júreginde 250 operatsııa jasalady. Olardyń 40 paıyzy júrek aqaýy bar jańa týǵan náresteler.
Túrkistan oblystyq balalar aýrýhanasynda dárigerlerdiń biliktiligin arttyrý maqsatynda túrli oqytý sharalary uıymdastyrylyp otyrady.
