Túrkistandyq dárigerler úzdik eýropalyq klınıkada tájirıbe jınaıtyn boldy
TÚRKІSTAN. QazAqparat - Túrkistan oblystyq Densaýlyq saqtaý basqarmasyna Ystanbulda ornalasqan Edıtepe (Yeditepe) ýnıversıtettik gospıtaliniń dırektory Ahmet Zıhnı Ajık pen birqatar dárigerler keldi.
Mártebeli qonaqtardy basqarma basshysy Muqan Egizbaev qabyldap, eki jaqty kelissózder júrgizdi, dep habarlaıdy QazAqparat tilshisi.
Kezdesý barysynda taraptar ortaq memorandým jasap, ekijaqty mańyzdy qujatqa qol qoıdy. Endi keler jyldyń qańtar aıynan bastap Túrkistan oblysynyń dárigerleri Ystanbuldaǵy Edıtepe (Yeditepe) ýnıversıtettik gospıtalinde tájirıbe jınaqtap, biliktiligin arttyrady. Túrik medıtsınalyq ýnıversıtetiniń bazasynda qurylǵan klınıka Eýropadaǵy eń ozyq keshendi densaýlyq saqtaý oshaǵynyń biri sanalady.
Túrkistan oblysynyń Densaýlyq saqtaý basqarmasy men ýnıversıtet gospıtali arasyndaǵy kelisimge sáıkes, densaýlyq saqtaý salasynda eki jaqty aqparat almasý, medıtsına mamandaryn daıarlaý jáne olardyń biliktiligin arttyrý josparlanýda.
Eske salaıyq, Edıtepe kópsalaly medıtsınalyq ortalyǵy 15 beıindi ortalyqty qamtıdy. Klınıkanyń negizgi baǵyttary - onkologııa, onkogematologııa, neırohırýrgııa, ýrologııa, gınekologııa, nevrologııa salalary. Medıtsına ortalyǵynyń dárigerleri eresekter men balalarǵa júrek, baýyr, búırek jáne súıek kemigin transplantatsııalaý boıynsha operatsııalar júrgizedi. Jyl saıyn 30 myńnan astam patsıentke qyzmet kórsetetin «aqyldy aýrýhana» álemdegi alǵashqy mıkrobqa qarsy aýrýhana bolyp otyr.
