Túrkistandyq dárigerler uıqy bezi isigine ota jasaýdyń jańa ádisin meńgerdi
TÚRKІSTAN. QazAqparat - Túrkistandyq dárigerler uıqy bezi isigine ota jasaýdyń jańa ádisin meńgerdi. Syzǵanov atyndaǵy ulttyq ǵylymı hırýrgııa ortalyǵynyń dırektory Bolatbek Baımahanov qaladaǵy ortalyq aýrýhanada 4 operatsııa jasap, tájirıbesimen bólisti, dep habarlaıdy QazAqparat tilshisi.
Bilikti maman jergilikti dárigerlerdiń basyn qosyp, aýyr otalardy jasaýdyń qyr-syryn úıretti. Sondaı-aq, qalalyq ortalyq aýrýhana men hırýrgııalyq zertteý ortalyǵy arasynda kelisim jasaldy. Oǵan sáıkes, túrkistandyq dárigerler atalǵan ortalyqta únemi bilimin jetildirip otyratyn boldy. Jaqyn arada jergilikti hırýrgterdi tájirıbe almasý úshin Almatyǵa jiberý josparlanyp otyr.
Aıta keteıik, sala mamandary óz kezeginde Túrkistan turǵyndarynyń ishki aǵza aýrýlaryna jıi ushyraıtynyn aıtady. Oǵan maıly, zııan taǵamdardy paıdalaný basty sebep. Buǵan deıin naýqastar mundaı operatsııa úshin elimizdiń iri qalalaryna baratyn bolsa, endi osyndaǵy qalalyq aýrýhanada jasatatyn bolady.
