Túrkistandyq dárigerler umyt bolǵan ejelgi bosaný ádisin jańǵyrtpaq
TÚRKІSTAN. QazAqparat - Túrkistan oblysynyń dárigerleri umyt bolǵan ejelgi bosaný ádisin jańǵyrtpaq. Shardara aýdandyq ortalyq aýrýhanasynyń bas dárigeri Janar Ospanova áıelderdiń arqanǵa tartylyp otyryp bosaný ádisin qoldanysqa engizip otyr, dep habarlaıdy QazAqparat tilshisi.
Mamandar osy tásil arqyly ananyń tolǵaǵyn jeńildetip, tez bosanýyna yqpal etýge bolatynyn aıtady. Qazir bul ádispen dúnıege sábı ákeletin analar sany kún sanap artyp keledi.
«Arqanǵa tartylyp otyryp bosaný burynǵy analarymyzdyń tarıhı ádisi bolǵan. Tik turǵan jaǵdaıda jáne búıirinde bosaný - dáleldi medıtsına negizinde tańdaý ádisi jáne DDU usynymy bolyp tabylady. Bul QR DSM klınıkalyq hattamaǵa da engizilgen. Medıtsınalyq turǵydan bul paıdaly dep sanalady. Tolǵaq qysqanda salmaq kúshi arqanǵa túsedi. Fızıologııalyq bosanýdyń barysynda tik bosaný ádisi tolǵaqty jeńildetip, balanyń basynyń jeńil ótýine jol beredi», - deıdi Shardara aýdandyq ortalyq aýrýhanasynyń bas dárigeri Janar Ospanova.
Óńirdegi dárigerler bosanýdyń bul ádisin tipti sheteldikter de qoldanatynyn estigen. Sol sebepti, elimizde oǵan patent alyp zańdastyrylǵanyn qalaıdy. Mundaı tájirıbe ázirge tek Shardara aýdandyq ortalyq aýrýhanasynda ǵana qoldanysqa engizilip otyr. Osy kúnge deıin arqannyń kómegimen úsh júzden astam bala dúnıege kelgen. Aýrýhana basshylyǵy jaqyn arada sýda bosaný ádisin de engizýdi josparlap otyr.
Aıta keteıik, qazirgi tańda júkti áıelder jalpy dástúrli, otyryp nemese búıirine jatyp bosaný arqyly sábıin dúnıege ákeledi.
