Túrkistandyq dárigerler Ulybrıtanııanyń úzdik neırogenetıkterimen tájirıbe almasty
TÚRKІSTAN. QazAqparat - Túrkistan oblysynyń dárigerleri Ulybrıtanııadan kelgen úzdik neırogenetıktermen tájirıbe almasty. Oblystyq densaýlyq saqtaý basqarmasy basshylyǵynyń shaqyrýymen kelgen sheteldik mamandar genetıkalyq aýrýdan zardap shegetin naýqastardy qarap, kómek kórsetti, dep habarlaıdy QazAqparat tilshisi.
Nevrologııa jáne neırogenetıka professory, University College of London nevrologııa ınstıtýty Neırogenetıkalyq zerthanasynyń jetekshisi Genrı Holden óńirge áriptesi ári osy JOO - nyń doktoranty, qazaqstandyq Raýan Qaıyrjanovpen birge keldi.
Jas ǵalym birneshe jyldan beri Anglııada oqyp, jumys isteıdi. Medıtsına ǵylymdarynyń magıstri, nevrolog, qozǵalys buzylýlary boıynsha úzdik maman London nevrologııa jáne Neırohırýrgııa ulttyq gospıtalinde qyzmet atqarady. Bilikti dárigerler sapar barysynda tuqym qýalaýshylyq patologııasynan zardap shegetin balalar men eresekterdi qabyldady. Olar 3 kún boıy osy keseldiń eń aýyr túrine shaldyqqan 100-ge jýyq naýqasqa kómek kórsetti. Sonymen qatar Ulybrıtanııadan arnaıy kelgen neırogenetıkter «Neırogenetıka jáne parkensonızm» taqyrybynda ǵylymı - praktıkalyq semınar ótkizdi. Álemdegi eń úzdik mamandardyń biri Túrkistan oblysynyń dárigerlerimen genetıkalyq aýrýlardy emdeýdiń jańa ádisterimen jáne tájirıbesimen bólisti.
Aıta keteıik, búginde túrkistandyq dárigerler tuqym qýalaıtyn aýrý túrlerin dál anyqtaı alady. Aldyńǵy qatarly tehnologııalar gendegi aýrýdyń qandaı deńgeıde buzylǵanyn anyqtaýǵa múmkindik beredi.
Mamandardyń pikirinshe, sońǵy kezde gendik mýtatsııalardan týyndaǵan aýrýlar da azaımaı otyr. Dárigerler mundaı aýrýlardy tek genetıkalyq saraptama nátıjeleri boıynsha ǵana anyqtaı alady. Al, sheteldik mamandar bolsa jýyq arada genetıkalyq aýrýdan, tuqym qýalaıtyn qozǵalý patologııasynan tolyq em alý múmkindigi paıda bolatynyn aıtyp otyr. Álemdik medıtsına alǵa qadam basyp, naýqastar úshin tolyqqandy ómir súrý múmkindigi paıda bolady. Sonymen qatar, dárigerlerdiń málimetteri boıynsha jyl saıyn tuqym qýalaıtyn aýrlardyń sany artyp keledi. Sonyń ishinde bizdiń óńir de bar.
