Túrkistandyq dárigerler soqyrishegi jarylyp ketken júkti áıel men sábıin qutqaryp qaldy
TÚRKІSTAN. QazAqparat- Túrkistan oblysynda dárigerler soqyrishegi jarylyp ketken júkti áıel men sábıin qutqaryp qaldy. Shardara aýdanynda turatyn kelinshek tikushaqpen oblys ortalyǵyna jetkizilip, oǵan birneshe saǵat boıy ota jasalǵan, dep habarlaıdy QazAqparat tilshisi.
Oblystyq densaýlyq saqtaý basqarmasy baspasóz qyzmetiniń málimetinshe, osydan birneshe kún buryn 29 jastaǵy Jansaıa Dúısenova jedel járdem arqyly aýdandyq ortalyq aýrýhanaǵa jetkizilgen. Ol jaqta jergilikti dárigerler jedel destrýktıvti appendıtsıtti anyqtaǵan. Soqyrishegi jarylyp ketken naýqas sanavıatsııa jelisimen oblystyq klınıkalyq aýrýhanaǵa jetkizildi. Dárigerlerdiń der kezinde kórsetilgen kómeginiń arqasynda ana men balanyń ómiri aman qaldy.
«Aýrýy asqynǵan ananyń jatyry men ishekteri irińdep ketken. Ádette mundaı jaǵdaıda aldymen ana ómirin aman alyp qalý máselesi birinshi turady. Ana ómirine tóngen úlken qaýipke qaramastan, sábı aman-esen dúnıege keldi. Ananyń jatyryn da saqtap qaldyq. Balany qutqarý úshin kesar tiligin jasaýǵa týra keldi. Oǵan sırek kezdesetin otanyń aýyr túri jasaldy. Negizinde júkti áıel úshin kez kelgen ilespe patologııa ómirge qaýipti. Bul jaǵdaıda áıel aýyr hırýrgııalyq patologııamen, perıtonıtpen jetkizildi. Bir mezette birneshe operatsııanyń aýyr túri jasalǵan naýqastyń beti beri qarap, jansaqtaý bóliminen aýystyryldy», - dedi oblystyq klınıkalyq aýrýhana bas dárigeriniń orynbasary Eldos Sultanov.
Aq halattylardyń aıtýynsha, ınfektsııa oshaǵy joıylǵan. Al, sábıi 2 keli 800 gramm salmaqpen ómirge kelgen. Ol da qazir dárigerler baqylaýyna alynǵan. Endi jańa bosanǵan jas ana úıine qaıtýǵa daıyndalyp jatyr.
«Úıde júrgende ishim qatty aýyrdy. Aıtolǵaq dep oılap, mán bermeppin. Keıin tura almaı qaldym, qusa bastadym. Dárigerler bolmaǵanda aman qalýym ekitalaı edi. Qyzymnyń aman qalǵanyna qýandym. Osy múmkindik úshin barlyq dárigerlerge sheksiz alǵys aıtamyn»,- deıdi Jansaıa Dúısenova.
