Túrkistandyq dárigerler ózbekstandyq áriptesterimen memorandým jasady
TÚRKІSTAN. QazAqparat - Túrkistan oblystyq densaýlyq saqtaý basqarmasynyń basshysy Muqan Egizbaev Ózbekstannyń iri medıtsınalyq mekemeleriniń dırektorlarymen memorandýmǵa qol qoıdy, dep habarlaıdy QazAqparat.
«Basqarma basshysy kórshiles memleketke jasaǵan jumys sapary barysynda Tashkent qalasynyń Endokrınologııa respýblıkalyq mamandandyrylǵan ǵylymı-praktıkalyq medıtsınalyq ortalyǵynyń dırektory, professor Anvar Álimovpen jáne Respýblıkalyq mamandandyrylǵan pedıatrııa ǵylymı-tájirıbelik medıtsınalyq ortalyǵynyń dırektory Dılorom Ahmedovamen kezdesti», delingen habarlamada.
Ekijaqty memorandým aıasynda eki eldegi medıtsınalyq mekemelerdi jańǵyrtý, telemedıtsına salasyndaǵy yntymaqtastyq boıynsha jobalardy júzege asyrý, birlesken ǵylymı-praktıkalyq semınarlar men konferentsııalar uıymdastyrý máseleleri kelisildi. Sondaı-aq, atalǵan qujat kóleminde ózara kásibı biliktiligin arttyryp, aqparatpen jáne tájirıbemen almasady. Jańa tehnologııalar men jańa medıtsınalyq jabdyqtardy ázirleý salasynda da ózara biliktiligin jetildiredi dep kútilýde.
Ózbekstandaǵy Endokrınologııa respýblıkalyq mamandandyrylǵan ǵylymı-praktıkalyq medıtsınalyq ortalyǵy - bul atalǵan eldiń eń úzdik medıtsınalyq mekemeleriniń biri. Bul ortalyq qazirgi zamanǵy emdeý-dıagnostıkalyq, ǵylymı-zertteý jáne endokrınologııalyq beıindegi pedagogıkalyq keshen bolyp esepteledi.
Endokrınologııa ortalyǵynyń basym mindetteriniń biri - ıod tapshylyǵy jaǵdaıyn joıý, qant dıabetin dıagnostıkalaý men emdeýge zamanaýı kózqaras, qalqansha beziniń patologııasyn emdeý jónindegi is-sharalar, onyń ishinde qalqansha beziniń saralanǵan obyrynyń túrli túrlerin qosa alǵanda, jedel quraldar men nýklearlyq medıtsına ádisterin qamtıdy.
Ortalyq dırektory Dıllor Ahmedova - 300-den astam ǵylymı basylymnyń avtory, dáriger-pedıatr, ǵalym, Densaýlyq saqtaý jáne halyqtyq bilim berý isiniń úzdigi.
Ortalyq balalarǵa mamandandyrylǵan kómek kórsetý, pedıatrııa salasynda ǵylymı zertteýler júrgizý, 13 óńirlik kóp beıindi balalar medıtsınalyq ortalyqtarynyń qyzmetin úılestirý jáne monıtorıngileý, el óńirlerinde sheftik jáne konsýltatsııalyq kómek kórsetý jolymen ony kórsetýdiń barlyq deńgeılerinde balalarǵa medıtsınalyq kómektiń sapasyn arttyrý boıynsha uıymdastyrý-ádistemelik baǵyttarynda jumys atqarady.
