Túrkistandyq dárigerler klınıkalyq ólimge ushyraǵan naýqasty qutqaryp qaldy
TÚRKІSTAN. QazAqparat - Kezekshilikte bolǵan túrkistandyq jedel járdem brıgadasy klınıkalyq ólimge ushyraǵan naýqasty qutqardy, dep habarlaıdy QazAqparat oblystyq qoǵamdyq densaýlyq saqtaý basqarmasynyń baspasóz qyzmetine silteme jasap.
Oblystyq jedel járdem qyzmetine beıtanys áıeldiń qoǵamdyq orynda qulap jatqany týraly habar kelip túsedi. Qutqarý toby 7 mınýtta jetken. Es-tússiz jatqan áıelge dárigerler «klınıkalyq ólim» dıagnozyn qoıǵan.
Medıtsınalyq qyzmetkerler júrek-ókpe jumysyn qalpyna keltirý úshin tez shara qoldanyp, naýqastyń beti beri qaraıdy. Dárigerlerdiń arqasynda 41 jastaǵy áıel klınıkalyq ólimnen keıin tirilgen. 2-shi top múgedegi densaýlyǵyna qatysty dárigerlik esepte turady. Feldsher Arman Saǵıdýlat qobaljyǵanyn jasyrmaıdy.
«Ómir men ólim arpalysyn kúnde kózben kórip júrgen soń naýqastardy qutqarýda bóten oıǵa jol joq. Óıtkeni dárigerlik kómek kórsetý - meniń mindetim. Árbir qutqarylǵan jan men úshin úlken qýanysh»,- deıdi ol.
Dárigerler naýqasty sanıtarlyq kólikpen aýrýhanaǵa jetkizdi. Qazir onyń jaǵdaıy bir qalypty, ómirine qaýip tónip turǵan joq.
Jyl basynan beri oblystyq medıtsınalyq jedel-járdem qyzmetine 62 myńǵa jýyq shaqyrtý túsken. Dárigerler 2 adamnyń ómirin ajaldan aman alyp qaldy.
