Túrkistandyq dárigerler bir aılyq náresteniń óńeshine ota jasap, aman alyp qaldy
TÚRKІSTAN. QazAqparat – Túrkistan oblystyq balalar aýrýhanasynyń jan saqtaý bólimine Túlkibas aýdanynan bir aılyq náreste aýyr halde jetkizilgen. Dárigerler sábıdiń júreginiń týa bitken aqaýy men asqazan ishek joldary jáne óńeshtegi tesik jaryqtary baryn sanaýly ýaqyt ishinde anyqtady, dep habarlaıdy QazAqparat tilshisi.
Oblystyq qoǵamdyq densaýlyq basqarmasynyń málimetinshe, barlyq qaýip-qaterler men asqynýlar tarazyǵa salynǵan. Balanyń jasandy qan aınalym jaǵdaıynda júrek aqaýyn túzetý jáne dıafragmanyń óńesh tesigine operatsııa jasaý sheshimi qabyldanǵan. Kardıohırýrgtar men neonataldy hırýrgterdiń bilikti quramy jasaǵan ota 4 saǵatqa sozyldy. Nátıjesinde náresteniń beti beri qarap, ómirine tóngen qaýip seıildi. Dárigerler otanyń mundaı kúrdeli túri óńirde alǵash ret jasalyp otyrǵanyn aıtady. Al, Dúnıejúzilik densaýlyq saqtaý uıymynyń málimeti boıynsha mundaı operatsııalar naýqastardyń 20 paıyzynda kezdesedi. Alaıda, náresteler men 3 aıǵa deıingi sábılerge birneshe kúrdeli ota jasaý joǵary mamandandyrylǵan dıagnostıkany jáne joǵary bilikti mamandardyń bolýyn talap etedi.
Aıta keteıik, bir aılyq náreste Balyqty aýylynyń turǵyny Dana Áshirbektiń besinshi perzenti. Bóbegin qıyn jaǵdaıda dárigerler qolyna tapsyrǵan kópbalaly ana abzal jandardyń biliktilikterine rıza bolyp, alǵysyn jetkizdi.
«Ár naýqastyń janyna jebeý bolyp, qandaı aýrýǵa bolmasyn qarsy turatyn dárigerlerge degen sheksiz alǵysymdy bildirgim keledi. Balamnyń aýrýyna arasha bola bilgen dárigerlerge jáne medbıkelerge sheksiz rızashylyǵymdy aıtamyn. Sizder bizge sheksiz baqyt syıladyńyzdar»,- deıdi Dana Áshirbek.
