Túrkistandyq dárigerler 5-qabattan qulaǵan balany aman alyp qaldy
TÚRKІSTAN.QazAqparat - Túrkistan oblysynyń dárigerleri 5 qabattyń terezesinen qulap ketken balanyń ómirin qutqaryp qaldy. 5 jasar búldirshin úıinde qaraýsyz qalyp, terezeniń torynan qulap ketken, dep habarlaıdy QazAqparat tilshisi.
Oblystyq balalar aýrýhanasy bas dárigeriniń orynbasary Bolat Nusqabaevtyń aıtýynsha, jedel járdem qyzmeti balany emdeý mekemesine jetkizgende es-tússiz, aýyr halde bolǵan.
«Balada bas mıynyń soqqysy, bas mıynyń shaıqalýy, bastyń kóptegen jaraqattary, jabyq bas mıynyń jaraqaty, keýde qýysynyń soǵylýy men denesinde kóptegen jaraqattar alǵany anyqtalǵan. Bala aýyr halde boldy. Tek tórtinshi táýlikte ǵana ol esin jıdy. 20 kúnge jýyq bala jansaqtaý bóliminde em qabyldady. Jan-jaqty medıtsınalyq kómek kórsetilip, bala aman qaldy. Em oń nátıje berip, naýqas óz aıaǵymen júre bastady»,-deıdi Bolat Nusqabaev.
Balalar aýrýhanasy bas dárigeriniń orynbasary kishkentaı naýqastyń bir aıdan astam em qabyldaǵanyn aıtady. Onyń sózinshe, balalardyń joǵarǵy qabattan qulap ketý jaıttary jıi oryn alyp jatady. Zardap shekkenderdiń deni 2-5 jas shamasyndaǵy balalar.
