Túrkistandyq bıznes ókilderine jeke kásipti tıimdi basqarý daǵdylary úıretilýde
TÚRKІSTAN. QazAqparat – Túrkistanda shaǵyn jáne orta bıznes ókilderiniń joǵary jáne orta býyn jetekshilerine arnalǵan «Іskerlik baılanys» jobasynyń birinshi kezeńi bastaldy. «Bıznestiń jol kartasy-2020» baǵdarlamasy aıasynda uıymdastyrylǵan sharaǵa 60-tan astam kásipker qatysty, dep habarlaıdy QazAqparat tilshisi.
Jobaǵa qatysýǵa nıet bildirgen isker azamattar bıznes-trenıngten ótip, basqarýshylyq sapa, bıznes jobalaý, taım-menedjment kelissózder tehnologııasy, biliktilikti jaqsartý baǵytynda bilim aldy. Túrkistan oblysy Kásipkerler palatasy qarjylaı emes qoldaý bóliminiń basshysy Janna Tileýbekovanyń aıtýynsha, joba Túrkistan qalasynda alǵash ret iske asýda.
«Búgin «Іskerlik baılanystar» qatysýshylary oqýǵa kiristi. Munda tájirıbeli bıznes-jattyqtyrýshylardyń basshylyǵymen kásipkerlikti, marketıngti júrgizýdiń, sondaı-aq bıznes-seriktestermen iskerlik baılanystar ornatýdyń qazirgi zamanǵy ádisteri zerdelenetin bolady. Qatysýshylar óz bıznesin barynsha tıimdi basqarýdy, maqsattardy durys qoıýdy, osy maqsattarǵa jetý boıynsha qadamdardy, jańashyldyqtardy úırenedi»,-dedi Janna Tileýbekova.
Túrkistan qalasynda oqý eki apta jalǵasady. Osy ýaqyt ishinde jobaǵa qatysýshylar birneshe bıznes-trenermen jumys isteı alady. Oqytý barysynda qatysýshylar sheteldik jáne otandyq bıznes-trenerlerdiń basshylyǵymen óz kásipornynyń nemese óniminiń bıznes-josparyn ázirleıdi.
Al ekinshi kezeńge sheteldik bıznes-taǵylymdamadan eń belsendi, tabysty jáne óziniń jumys bıznes-josparyn usynatyndar irikteledi. Qatysýshynyń shyǵyndary óteledi. Osylaısha, ózi úshin eń az shyǵynmen kásipker ozyq sheteldik óndiristerge baryp, olardyń tájirıbesin bolashaqta óz óndirisinde qoldana alady. Sonymen qatar, bir aı ishinde qatysýshylar óz salasy boıynsha sheteldik kásiporyndardy aralap, sheteldik áriptestermen iskerlik baılanys ornata alady. Bul kezeń Germanııada ótedi.
Sonymen qatar, «Іskerlik baılanystar» jobasynyń qatysýshylary jańa jumys oryndaryn quryp, óz óndirisin jańǵyrtyp, otandyq jáne sheteldik bıznesmendermen kelisim - sharttar jasaıdy - osynyń barlyǵy eldiń ekonomıkalyq ósýine úlken úles qospaq.
Semınar aıaqtalǵannan keıin qatysýshylar kýrsty sátti aıaqtaǵany týraly sertıfıkat alyp, Germanııaǵa barý úshin baǵdarlamanyń ekinshi kezeńine konkýrstyq irikteýge qatysa alady.
