Túrkistandyq bıshiler Reseıde ótken halyqaralyq baıqaýda jeńimpaz atandy
TÚRKІSTAN. QazAqparat - Túrkistan oblysyndaǵy «Qazyna» bı ansambliniń ónerpazdary Reseı Federatsııasynyń Sankt-Peterbýrg qalasynda ótken VII Halyqaralyq «Rozy Rossıı-2019» bıshiler baıqaýyna qatysyp qaıtty.
Halyqaralyq dárejede ótken baıqaýda Gúlnaz Sydyqova men Júrsinbek Aqtóre arnaıy І-dárejeli marapatqa ıe boldy, dep habarlaıdy QazAqparat tilshisi.
Túrkistandyq «Qazyna» bı ansambli atalǵan baıqaýda «Qara jorǵa», «Dombyra», «Ańshylar», «Kózimniń qarasy» jáne uıǵyrdyń «Dolan-mashrap», «Chın-Taxsa» bılerin bılep, kórermen yqylasyna bólendi.
Baıqaý qortyndysymen QR Eńbek sińirgen qaıratkeri, «Qazyna» bı ansambliniń kórkemdik jetekshisi jáne bas baletmeısteri Záýre Ájibekova «Shyǵarmashylyq yntymaqtastyq úshin» jáne bı ujymy «Joǵary dárejedegi kásibı ujym», «Shynaıy ári jańasha saxnalyq xoreografııalyq qozǵalystary úshin», «Ulttyq bı», «Zamanaýı xoreografııa» (dýet) nomınatsııalarymen marapattaldy.
Qazaqstan Respýblıkasynyń Sankt-Peterbýrg qalasyndaǵy bas konsýl Bolat Imanbaev kórkemdik jetekshige arnaıy alǵys hat pen halyqaralyq tájirıbe almasý boıynsha sertıfıkatyn tabystady.
