Túrkistandyq balalarmen tolyqqan mektep jabylýdan aman qaldy - Qostanaı
QOSTANAI. QazAqparat - «Túrkistan - Qyzyljar - Qostanaı - Kókshetaý» aqparattyq týrynda júrgen túrkistandyq BAQ ókilderiniń sapary Qostanaı oblysy, Sarykól aýdanynda jalǵasyn tapty, dep habarlaıdy QazAqparat Túrkistan oblysy óńirlik kommýnıkatsııa qyzmetine silteme jasap.
Tágil aýyldyq okrýgy, Sonaly aýylyna at basyn tiregen delegatsııa aýyldyń tynys-tirshiligimen tanysyp, Sonaly orta mektebine bardy. Bul mektepte Túrkistan oblysy, Jetisaı aýdanynan byltyr kóship kelgen Aqsholpan Zulpyharova orys tili men ádebıeti páninen sabaq beredi. 4 balanyń anasy Aqsholpan óziniń batyldyq tanytyp kóship kelgenine ókinbeıtinin jetkizdi. Jumysshy bolyp isteıtin joldasynyń aılyǵy da jetkilikti.
Sondaı-aq, atalǵan mektepte medbıke bolyp jumys atqaratyn Tursynaı Safarova da mamandyǵy boıynsha Jetisaı aýdanynan kóship kelgen.
Aıta keterligi, Sonaly mektebinde 41 oqýshy bolsa, sonyń ishinde 19 oqýshy ońtústik óńirden kóship kelgen otbasylardyń balalary. Kúngeıden kóptep kelgen oqýshylardyń arqasynda jabylýǵa shaq qalǵan mektep qazir tolyqqandy jumys isteýde.
Bul aýqymdy ári mańyzdy sapar Túrkistan oblysy qoǵamdyq damý basqarmasynyń uıymdastyrýymen ótýde.
Óńirge qonystanǵan kúngeılikterdiń ómirimen tanysýǵa kelgen jýrnalıster qaýymy birneshe aýdandardy aralaıtyn bolady.
