Túrkistandyq balalar Horvatııaǵa baryp, fýtbol oınap úırenedi
Óńirde balalar fýtbolyn damytýǵa kúsh salynbaq. «Turan» fýtbol akademııasy qurylyp, shetelden bapkerler tartylǵan.
Túrkistan oblysynyń ákimi Darhan Satybaldy Horvatııa Respýblıkasynyń Týrızm jáne sport mınıstrliginiń Memlekettik hatshysy Tonchı Glavına bastap kelgen delegatsııany qabyldady. Oblys basshysy Katarda ótip jatqan fýtboldan Álem chempıonatynda Horvatııanyń jartylaı fınalyna shyǵýymen quttyqtap, sáttilik tiledi.
Delegatsııa quramynda Horvatııanyń Qazaqstandaǵy Tótenshe jáne Ókiletti Elshisi Refık Shabanovıch te boldy.
Kezdesýde oblys basshysy Darhan Satybaldy ekijaqty iskerlik baılanysty odan ári nyǵaıtý jaıly aıtty. Taraptar sport pen týrızm salasyn damytý baǵytyndaǵy jumystardy talqylady. Oblys ákimi tıimdi áleýmettik jobalarmen birlese jumys isteýdi usyndy. Damý jolyndaǵy ınvestıtsııalyq múmkindikteriniń molaıǵanyn jáne óńirde óndiristi damytýǵa kúsh salynyp otyrǵanyn atap ótti.
«El Prezıdenti Qasym-Jomart Toqaev Túrkistanǵa jumys saparynda Túrkistan qalasyna elimizdiń rýhanı – mádenı ortalyǵy mártebesin berý máselesin kóterdi. Túrkistan – Qazaq handyǵynyń astanasy bolǵan uly shahar. Tarıhı sheshimder osy qalada qabyldanǵan. Tórt jylda oblys ortalyǵy tanymastaı ózgerdi. Oblys qarqyndy damyp keledi. Sport salasyn damytýǵa, onyń ishinde fýtboldy damytýǵa kúsh salynady. Osy arqyly týrızmdi damytýǵa da múmkindik artpaq. Biz Horvatııanyń fýtboldaǵy tabystaryn bilemiz. Búgin Argentınamen kezdesýde quramalaryńyzǵa jeńis pen sáttilik tileımin! Bizdiń jasóspirim fýtbolshylardy daıarlaýda Horvatııa mamandary men fýtbol akademııalarymen birlese jumys atqarýǵa daıynbyz», – dedi oblys ákimi.
Horvatııanyń Qazaqstandaǵy Tótenshe jáne Ókiletti Elshisi Refık Shabanovıch fýtboldy damytý baǵytyndaǵy pikirlerin aıtty.
«Balany fýtbolǵa erte jastan berý kerek. Segiz-toǵyz jas kesh bolýy múmkin. Horvatııanyń fýtbol akademııalary men mektepteriniń jetistikterin álem biledi. Oǵan bizdiń fýtbolshylardyń jeńisteri dálel. Horvatııada árbir turǵyn fýtboldyń jankúıeri desek qatelespeımin. Sizderde fýtbol damýy úshin jankúıerleri kóp bolýy kerek. Balalar fýtbolynan bastaǵan jón. Biz qazaq balalarynyń álemdik arenada jarqyraýyna tilektespiz», – dedi elshi.
Kezdesý sońynda horvatııalyq delegatsııa Túrkistan qalasynyń sáýletine jyly pikirlerin bildirip, Túrkistan oblysynyń ákimi Darhan Satybaldyǵa Horvatııa ulttyq quramasynyń sporttyq formasyn syıǵa tartty.
