Túrkistandyq azamattar kópbalaly anaǵa 2 bólmeli úı alyp berdi

TÚRKІSTAN. QazAqparat - Túrkistanda Sıdneı Olımpıadasynyń chempıony, І dárejeli «Barys» ordeniniń birinshi ıegeri Bekzat Sattarhanovtyń týǵan kúnine oraı «Ulystyń uly kúni jasalǵan ıgi is» atty merekelik shara uıymdastyryldy. «Nur Otan» partııasy janyndaǵy «Jas Otan» jastar qanatynyń qoldaýymen ótken sharada sporttyq jarystar uıymdastyrylyp, estrada juldyzdary án shyrqady, dep habarlaıdy QazAqparat tilshisi.

Bekzat Sattarhanov atyndaǵy móltek aýdanda ótken jıynda úsh myń adamǵa as tarqatylyp, aýyl aqsaqaldary jastarǵa bata berdi. Sporttyń taekvondo, boks, kúres, arqan tartys sııaqty túrlerinen saıystar ótkizildi. Qazaqtyń aqyndyq óneriniń sańlaqtary Bekarys Shoıbekov pen Muhtar Nııazov óner kórsetip, sharanyń kórkin qyzdyrdy. Tanymal ánshi Erkin Nurjanov pen ózge de juldyzdar kópshilik qaýymnyń kóńilin kóterip tastady.

Eń bastysy, aýdannyń bir top azamattary múgedek sanatyndaǵy, kópbalaly Nurgúl Jaqyp esimdi anaǵa 2 bólmeli úıdiń kiltin tabystady.