Túrkistandyq azamat elordadaǵy joǵary sot ǵımaraty aldynda ózin órtemek bolǵan

NUR-SULTAN. QazAqparat – Keshe elordada er adam joǵary sot ǵımaraty aldynda ústine benzın quıyp ózin órteýge áreket jasaǵan, dep habarlaıdy QazAqparat tilshisi Nur-Sultan qalalyq sotyna silteme jasap.

«Bıyl 20 shildede M. atty azamat QR Joǵarǵy Sot ǵımaratynyń aldynda ústine benzın quıyp, ózin-ózi órteýge oqtalǵan. Oǵan qatysty «Usaq buzaqylyq» (ÁQBtK-niń 434-babynyń 1-bóligi) baby boıynsha ákimshilik is qozǵaldy. M.-niń túsiniktemesine sáıkes ol Túrkistan oblysynyń birinshi satyly sotynda qaralyp jatqan qylmystyq is boıynsha jábirlenýshiniń aǵasy bolyp shyqty», - delingen habarlamada.

Qazir atalǵan azamat qamaýda.

«Ákimshilik quqyq buzýshylyqtar jónindegi mamandandyrylǵan aýdanaralyq sot M.-di ÁQBtK-niń 434-babynyń 1-bóligi boıynsha quqyq buzýshylyq jasaǵany úshin kináli dep tanyp, 5 táýlik merzimge ákimshilik qamaýǵa alyndy», - dep málimdeıdi qalalyq sottan.

Sondaı-aq, jaza qasaqana jasalǵan árekettiń qoǵamǵa teris áser etetin jáne qoǵamdy qurmettemeýdiń belgisi ekenin eskere otyryp taǵaıyndalǵany aıtylǵan.

Qaýly zańdy kúshine engen joq.