Túrkistandyq áıel óz úıinde órtenip ketti
ASTANA. QazAqparat - Túrkistan oblysynda jeke úı órtenip, 47 jastaǵy áıeldiń denesi tabyldy, dep habarlaıdy Qazaqparat tilshisi QR ІІM Tótenshe jaǵdaılar komıtetine silteme jasap.
«20 qazan kúni saǵat 00:19-de órtke qarsy qyzmet pýltine Túrkistan oblysy Saıram aýdany Qasymbet datqa aýylyndaǵy jeke úıdiń órtenýi týraly aqparat kelip tústi. Órtti sóndirýge 18 órt sóndirýshi men 4 tehnıka jiberildi. Órttiń jalpy aýmaǵy - 120 sharshy metr", - dep habarlady QR ІІM TJ Komıtetiniń resmı ókili Nursultan Nurahmetov.
Resmı habarlamaǵa sáıkes, tilsiz jaý 01:18-de toqtatylǵan jáne 03:20-da tolyq sóndirilgen.
«Oqıǵa ornynan 1971 jyly týǵan áıeldiń máıiti tabyldy. Boljam boıynsha órt shylym shegýde qaýipsizdikti saqtamaýdan tutanǵan», - delingen habarlamada.
