Túrkistandyq 9 oqýshy halyqaralyq jarysta júlde enshiledi
TÚRKІSTAN. QazAqparat - Almaty qalasynda ál-Farabı atyndaǵy Qazaq Ulttyq ýnıversıtetinde Ómirbek Joldasbekov atyndaǵy ІH halyqaralyq matematıka jáne mehanıkadan ǵylymı-zertteý saıysy ótti. Bul týraly ákimdiktiń baspasóz qyzmetine silteme jasap QazAqparat habarlaıdy.
Dástúrge aınalǵan baıqaý ataqty ǵalym, kórnekti qoǵam qaıratkeri Ó. Joldasbekovtiń eskertkishine gúl shoqtaryn qoıýdan bastaldy. Baıqaýǵa Qyrǵyzstan, Tájikstan, Ázerbaıjan jáne Qazaqstannyń barlyq aımaqtarynan 200- ge jýyq mektep oqýshylary qatysty.
Baıqaýdyń maqsaty - daryndy oqýshylardy qoldaý, olardyń matematıka jáne mehanıka ǵylymdary salasyndaǵy ǵylymı-zertteý jumystaryna qyzyǵýshylyqtaryn arttyrýǵa baǵyttalǵan. Dástúrge aınalǵan halyqaralyq baıqaýda jas talanttar 3 kún boıy ózderiniń ártúrli ǵylymı jobalarymen zııatkerlik saıysqa tústi.
Halyqaralyq baıqaýǵa Túrkistan oblysynan 14 oqýshy joldama alyp, daryndy oqýshylar ózderiniń ǵylymı-zertteý jumystaryn qazylar alqasynyń nazaryna usyndy. Nátıjesinde 9 oqýshy júldeger atandy. Halyqaralyq joba jarysynda ekonomıka páni boıynsha 11-synyp oqýshylary Bekjan Dáýirjan, Serik Aıjan 2-oryndy ıelense, Nurbah Amırhan, Kamıla Amangeldıeva qola júldeger atandy. Matematıka jáne mehanıka pánderinen 11-synyptyń oqýshysy Maral Mahanbet 2-oryn alsa, Dıana Darıbaeva, Dıana Mısırova, Asyljan Qaldybek, Mýhrıddın Sharapov 3-oryndy qanaǵat tutty.
Saıys sońynda jeńimpazdar Qazaqstan Respýblıkasynyń Bilim jáne ǵylym mınıstrliginiń arnaıy dıplomdarymen jáne medaldarymen marapattaldy. Bilimimen oza shapqan órenderdi Túrkistan jurtshylyǵy qurmetpen kútip aldy.
Aıta keteıik, Halyqaralyq baıqaýǵa Kentaý qalasyndaǵy mamandandyrylǵan «Daryn» mektep-ınternatynan 14 oqýshy qatysty. Onyń 3-i kúmis medal alsa, al 6-y qola medalǵa ıe boldy.
