Túrkistandyq 60 otbasy Soltústik óńirge kóshýge nıetti
ASTANA. QazAqparat - Elbasy Joldaýyndaǵy eńbek naryǵyn damytý boıynsha qolǵa alynǵan baǵdarlama aıasynda túrkistandyq 60-tan astam otbasy Soltústik óńirge qonys aýdarýǵa nıet bildirip otyr, dep habarlaıdy OQO ákiminiń baspasóz qyzmeti.
Jumys kúshi mol oblystardan jumys kúshi tapshy aımaqtarǵa jumysshy tobyn tartý maqsatynda jýyrda soltústik óńirden arnaıy delegatsııa kelip, túrkistandyq turǵyndarmen jeke-dara kezdesýler ótkizdi. Nátıjesinde, kóship-qoný kezindegi járdemaqylardyń der kezinde tólenetinine jáne jumyspen qamtylyp, baspanaly bolatynyna kóz jetkizgen 60-tan astam otbasy qonys aýdarýǵa nıet bildirgen.
Túrkistan qalalyq jumyspen qamtýdy úılestirý jáne áleýmettik baǵdarlamalar bóliminiń aıtýynsha, búgingi tańda 27 adam, onyń ishinde 10 adam medıtsına salasy, 5 adam bilim salasy boıynsha, qalǵandary mehanızator, aýyl sharýashylyǵy salasy boıynsha ótinish bildirip otyr eken.
Qonys aýdarýshylarǵa múmkindik zor. Qyzmettik turǵyn úı bolmaǵan jaǵdaıda azamattyń kommýnaldyq tólemderi men basqa da shyǵyndary óteledi. Sýbsıdııa kólemi Ekibastuz qalasyna baratyndarǵa 25 aılyq eseptik kórsetkishpen eseptelse, Jelezınsk aýdanynda 40 myń teńge kóleminde. Arnaıy kelisimge sáıkes, 5 jyl boıy búkil qajettilikter qamtamasyz etiledi.
«Osy baǵdarlama aıasynda biz bul otbasylarǵa 35 aılyq eseptik kórsetkish stavkasy boıynsha sýbsıdııa usynamyz. Ol ár otbasy múshesine 79000 teńgeden degen sóz. Sondaı-aq qyzmettik turǵyn oryn nemese úı beriledi»,-dedi Ekibastuz qalalyq jumyspen qamtýdy úılestirý jáne áleýmettik baǵdarlamalar bólimi basshysynyń orynbasary D.Qurymbaeva.
Aıta keteıik, Soltústik aımaqta dárigerler men feldsherler tapshy. Sonymen qatar, pedagogtar men al aýyl sharýashylyǵy mamandary: mehanızator syndy jumysshy tapqa da suranys joǵary.
