Túrkistandyq 100 jasaǵan ájeler shóbereniń alaqanynan maı jalap, shópshegin erkeletip otyr
TÚRKІSTAN. QazAqparat - Túrkistandyq 100 jasaǵan ájeler shóbereniń alaqanynan maı jalap, shópshegin erkeletip otyr, dep habarlaıdy QazAqparat tilshisi.
Túrkistan qalasynyń ózinde jasy 100-di eńsergen 6 ana turady.
Sonyń biri 102 jasqa tolǵan Qyzsulý Nurhanova ómirge 13 perzent alyp kelgen.
Qazir úlken uly 75-ke tolypty. Al, 40 jýyq nemereniń tuńǵyshy 50 jasty eńserip otyr. Shóberesiniń aldy bolsa orda buzar 30 jasta.
«Eldiń amandyǵyn tileımin. Ómirde tek beıbitshilik bolsyn! Elimiz órkendep, damı bersin», - deıdi ǵasyr kýágeri.
Keles aýdanynyń turǵyny Qatıra Nanabekova 8 naýryz kúni 100 jasqa tolady.
B úginde ónegeli áýlettiń shamshyraǵy bolǵan aq jaýlyqty ana beınetpen ótken ǵumyrynyń zeınetine bólenip, urpaqtarynyń aldynda baqytty ómir keship keledi.
Tylda ter tógip, eńbek etken ol ómirge ákelgen 4 perzentinen 15 nemere 52 shóbere súıip otyr.
Saryaǵashtyq Jadyra Keskenbaeva 10 naýryzda 102 jasqa tolǵan týǵan kúnin toılaıdy. Qart ana 7 ul-qyzdy dúnıege ákelgen. Qazirgi tańda 35 nemere men 82 shóberesi, 4 shópshegi bar.
Ordabasy aýdanynda 100 jastan asqan tyl ardagerleri Shambek Rahmanova men Hlaýda Keneldiqyzy jáne Kenje Ótkelbaeva bar.
1916 jyly 1 qańtarda dúnıege kelgen Shambek áje búginde Temirlan aýylyndaǵy kenje qyzy Altynnyń qolynda turady.
15 shaqty ul-qyz tárbıelep ósirgen altyn qursaq ana nemere, shóbere, shópshek, nemenesin qosqanda 150-den astam urpaqtyń qazynaly aqylshysyna aınalǵan.
Shóbereniń qolynan maı jalap, shópshegin aldyna alyp erkeletip otyr
Al, Uıaljar aýylynda turatyn Hlaýda áje naǵyz eńbektiń adamy bolǵan.
El basyna kún týǵan qıyn kezeńde er azamattarmen qatar ketpen shaýyp, shıetteı bala-shaǵasyn asyrapty.
«Hlaýda anamyz jas kezinde óte eńbekqor bolyp, aınalasyna, ásirese úlkenderge kómektesýdi ádetke aınaldyrypty. Mine sol aýyldyń aýzy dýaly qarttarynyń «Júz jasa, baqytty bol!» degen aq batasynyń arqasynda búginde júzden asyp, ósip-óngen áýletke aınaldy», - deıdi Hlaýda ájeniń uly, Bórjar aýyldyq Ardagerler keńesiniń tóraǵasy Danaı Erejep.
Mereke qarsańynda Túrkistan oblysyndaǵy jasy júzden asqan analar arnaıy syı qurmetke ıe boldy.
Aýdan, qala ákimderi arnaıy quttyqtap, ıyqtaryna oramal jaýyp, kóktem merekesimen quttyqtady.
