Túrkistandy túletýge jastar da úles qosady

TÚRKІSTAN. QazAqparat - Túrkistandyq jastar jańadan qurylǵan oblys ortalyǵyn túletýge óz úlesterin qospaq. Qalalyq Jastar resýrstyq ortalyǵy basshysynyń mindetin atqarýshy Erulan Tuńǵyshbaev Jastar jylynda ıgi ister qolǵa alyna bastaǵanyn atap ótti, dep habarlaıdy QazAqparat tilshisi.

Astanada ótken Jastar jylynyń ashylý saltanatyn tikeleı efırden tamashalaǵan Erulan Tuńǵyshbaev kóńiline birneshe oı túıip, Elbasynyń jastar arasynda jumyssyzdyqty azaıtý máselesin atap ótkenine rızashylyǵyn bildirdi. Onyń pikirinshe, Memleket basshysynyń bul kórsetkishti 1 paıyzǵa deıin tómendetý jónindegi tapsyrmasy ári bastamasy qoǵamnyń ózekti máselesin dóp basty.

«Qazir qos-qos dıplomy bolsa da, eki qolǵa bir kúrek tappaı júrgen jastar jetkilikti. Memleket basshysy: «Keleshekte eńbek naryǵyna shyǵatyn jastardyń sany arta túsetin bolady», - dedi. Jastarǵa memleket tarapynan qoldaý kórsetilse, jumys oryndary kóbeıse jastar jylynyń máni arta túspek. Búginde Túrkistan oblysynda bul baǵytta jumys bastalyp ketti deýge negiz bar. Elbasymyzdyń tikeleı tapsyrmasymen ári qoldaýymen jańa tynysy ashylǵan Túrkistan qalasynda qurylys jumystary bastalyp ketti. Aldaǵy ýaqytta da qarqyny arta túsedi. Mine, osy qaınaǵan eńbektiń ortasyna jalyndy jastar da qosylyp, jumyspen qamtylýda. Túrkistannyń týrıstik áleýeti kóteriletinin eskersek, jastarǵa jumys oryndary kóbeıedi dep senimmen aıtýǵa bolady. Jastar jyly jas órenderge oń serpin beretin naqty jobalar men jumystardy qolǵa alynyp jatqany qýantady. Bul baǵytta jumysty kúsheıtemiz», - dedi qalalyq Jastar resýrstyq ortalyǵy basshysynyń mindetin atqarýshy.