Túrkistandy tórtinshi megapolıske aınaldyrý josparda joq – Ómirzaq Shókeev

TÚRKІSTAN. QazAqparat – Túrkistandy tórtinshi megapolıske aınaldyrý máselesi josparlanyp otyrǵan joq. Bul týraly ortalyq kommýnıkatsııalar qyzmetinde ótken brıfıngide oblys ákimi Ómirzaq Shókeev aıtty, dep habarlaıdy QazAqparat tilshisi.

Bıyl Túrkistan oblysynyń qurylǵanyna 4 jyl toldy. Ákimniń aıtýynsha, osy qysqa ýaqyt ishinde óńirdiń áleýmettik-ekonomıkalyq damýy jaqsaryp, barlyq salada ósim saqtalǵan.

«Osy tórt jylda oblystyń áleýmettik-ekonomıkalyq damýynyń oń úrdisi aıqyn ańǵaryldy. Atap aıtqanda, jalpy óńirlik ónim kólemi 1,6 ese artyp, 2,8 trln teńgege jetti. Ónerkásip ónim kólemi 707,8 mlrd, aýyl sharýashylyǵy 906,5 mlrd teńgege jetti. Oblys bıýdjetiniń kólemi 1,7 esege artyp, 970,3 mlrd teńge boldy. Atqarylǵan júıeli jumystardyń nátıjesinde bıylǵy 5 aıda oń ósim saqtaldy. Túrkistandy tórtinshi megapolıske aınaldyrý josparda joq», – dedi Ómirzaq Shókeev.

Aıta keteıik, búginde Túrkistan qalasynda halyq sany 200 myńnan asty. Al, oblysta 2 mln artyq adam turady.