Túrkistandy rýhanı astanaǵa aınaldyrý ulttyq mega jobasy Úkimettik deńgeıde qaralsa ıgi - Ǵ. Qasymov
ASTANA. 21 aqpan. QazAqparat - Túrkistan qalasyn rýhanı astanaǵa aınaldyrý ulttyq mega jobasy Úkimettik deńgeıde qaralsa ıgi.
Búgin Parlament Cenatynyń jalpy otyrysynda Úkimet basshysynyń atyna saýal joldaǵan senator Ǵanı Qasymov osy máseleni kóterdi.
«Ońtústik óńirindegi kıeli Túrkistan qalasynyń el ómirinde rýhanı mańyzǵa ıe ekeni barshaǵa málim. Ótken jyldyń sońynda osy ólkege baılanysty belgili akademık Orazaly Sábdenniń «Túrkistan qalasyn rýhanı astanaǵa (ortalyqqa) aınaldyrý» atty halyqaralyq ulttyq mega jobasy usynylyp, baspasóz betterinde jarııalandy. Bul halyq arasynda da úlken qyzyǵýshylyq týǵyzýda. Jobanyń elimiz úshin úlken mańyzy bar dep esepteımin. Aldaǵy jyldary EKSPO-2017 halyqaralyq kórmesin ótkizýge daıyndyq jasap jatyrmyz. Osyǵan baılanysty biz kóne Túrkistandy jańǵyrtý arqyly myńdaǵan shetel azamattaryna tól tarıhymyzdy, rýhanı-mádenı qundylyqtarymyzdy kórsetýge múmkindik alar edik», - deıdi saýalynda senator Ǵanı Qasymov.
Osy rette depýtat «Túrkistan qalasyn rýhanı astanaǵa (ortalyqqa) aınaldyrý» atty halyqaralyq ulttyq mega jobany júzege asyrý joldaryn Úkimet deńgeıde qaraýdy suraıdy.
