Túrkistandy kóriktendirýge Shardara aýdany da erekshe úles qosýda
TÚRKІSTAN. QazAqparat – Túrkistan qalasy oblys ortalyǵy bolǵan kúnnen bastap, shahardy damytý jáne abattandyrý, kógaldandyrý boıynsha qarqyndy jumystar atqarylyp keledi. Bul turǵyda Shardara aýdany da erekshe úlesin qosyp, ózderne bólingen №10 sektorda aýqymdy jumystar atqaryp keledi, dep habarlaıdy QazAqparat tilshisi.
Shardara aýdandyq turǵyn úı-kommýnaldyq sharýashylyq, jolaýshylar kóligi jáne avtomobıl joldary bólimi men «Shardara servıs» MKK jáne «Shardara jasyl aımaq» MKK №10 sektor aýmaǵynda abattandyrý, kógaldandyrý boıynsha ınventarızatsııalaý sharalaryn júrgizildi. Bekitilgen josparǵa sáıkes Qorqyt ata men Arystan bab kósheleriniń aralyǵynda skver qurylysy bastalyp, 0,6 ga jer tolyqtaı tegistelip shyqqan. Aıaq jol plıtalary ornatylyp, fýtbol alańshasynyń beton qabaty men jasandy gazon tóselgen. Alańshalarǵa syrtqy qorshaýlar ornatylǵan. Sport jáne balalar alańshasynyń negizgi beton qabaty jasalyp, turǵyndar demalatyn oryndyqtar qoıylǵan. Sonymen qatar sport jáne balalar alańshasyna oıyn jabdyqtary ornalastyrylǵan.
Búgingi kúni skver aýmaǵyna egiletin jasyl ekpelerdi sýarý maqsatynda uńǵyma qazylyp, avtoturaq ornyna asfalt tóseldi. Skver aýmaǵynda qurylys jumystary tolyq aıaqtalǵan. Aýdan tarapynan uzyndyǵy 1,2 shaqyrymdy quraıtyn kóshe boıyna 2 aıaldama men 2 qoqys jáshigi ornatyldy. Al, sektor aýmaǵyna 5058 túp aǵash kóshetteri otyrǵyzylyp, jańadan egilgen 300 túp tuıa men jaı japyraqty aǵashtar sýarylýda.
Qazirgi kezde jumysshylar, egilgen aǵash kóshetterin kútip baptaý, kóshe boıyndaǵy qoqystardy tazalaý jumystaryn atqarýda. Bul maqsatta Shardara aýdanynan 2 avtotsesterna kóligi bólinip, tasymaldap sýǵarý jumystary kúndelikti júrgizilýde.
