Túrkistandy gazben tolyq qamtý jumystary qarqyndy júrgizilýde

TÚRKІSTAN. QazAqparat – Túrkistan qalasy turǵyndarynyń ómir súrý sapasyn jaqsartýdyń negizi retinde ınfraqurylymdy damytýǵa erekshe mán berilip keledi. Osy oraıda, óńir basshysy Ómirzaq Shókeev jaýapty sala jetekshilerimen birge oblys ortalyǵyn aralap, qalanyń Bas josparyna sáıkes atqarylyp jatqan jumystardy pysyqtady, dep habarlaıdy QazAqparat tilshisi.

Shahardaǵy jol jóndeý, gaz, aýyzsý men káriz júıesin júrgizý jumystaryn teksergen oblys ákimi tıisti sala jetekshilerinen qurylystyń kestege sáıkes belgilengen merziminde aıaqtalýyn talap etti. Tıisti sala basshylaryna naqty tapsyrmalar júktedi. Ómirzaq Shókeevtiń tapsyrmasyna sáıkes, Túrkistan qalasynyń ekologııalyq jaǵdaıyn jaqsartý maqsatynda shaǵyn aýdandarda ornalasqan áleýmettik nysandardy gazǵa ótkizý jumystary júrgizilýde.

Balabaqshalar, saýda ortalyqtary, jekelegen kásiporyndar, meıramhanalar men qonaq úıler de kógildir otynǵa qosylýda. Bul jumystar 11 kezeń boıynsha júrgizilip, jyl sońynda deıin 7 nysan paıdalanýǵa beriletin bolady dep kútilýde. Bul rette aımaq basshysy qurylysy júrgizilip jatqan «Túrkistan qalasyn gazben qamtamasyz etý (ІІ-kezeń GRP-2,3)» jáne qurylysy mamyr aıynda aıaqtalǵan «Túrkistan qalasyn gazben qamtamasyz etý (ІІІ-kezeń GRP-6,7,8)» nysandarynyń qurylys barysymen tanysty.

Turǵyn úılerdiń tabıǵı gazǵa qosylýy boıynsha túsindirý jumystary turaqty júrgizilip jatqanyna kóz jetkizdi. Atqarylǵan júıeli jumystardyń nátıjesinde 13 332 abonentke ishki gaz qubyry júıeleri júrgizilip, 8120 abonent tabıǵı gazǵa qosylǵan. Káriz jelilerin salý jobasy boıynsha áli de jalǵasyn tabýda.

Joba boıynsha 21,514 shaqyrym káriz júıeleri men 703 dana temirbetondy qudyqshalardyń qurylysyn salý qaralǵan. Atalǵan nysandar qurylysy iske asyrylǵan jaǵdaıda, Túrkistan qalasy tolyqtaı káriz júıelerimen qamtamasyz etiletin bolady.