Túrkistandy damytýǵa úkimettik emes uıymdar da úles qosady

 TÚRKІSTAN. QazAqparat -  Búgin Túrkistan  qalasynda «Azamattyq qoǵam jáne memleket: dıalog, áriptestik jáne jaýapkershilik» taqyrybynda úkimettik emes uıymdardyń oblystyq VIII Azamattyq forýmy ótti. Keleli basqosýǵa óńirdegi úkimettik emes uıymdardyń basshylary men ókilderi, qoǵamdyq birlestik jetekshileri men azamattyq belsendiler men kásipkerler jáne BAQ ókilderi qatysty, dep habarlaıdy QazAqparat tilshisi.

Forýmda Túrkistan oblysynyń ákimi Janseıit Túımebaev úkimettik emes uıymdardyń qoǵamdaǵy orny erekshe ekenin aıtyp, qoǵamdyq uıymdar eldi órkendetý baǵytynda jumys isteýi kerek degen oıyn jetkizdi.

«Elbasy Jarlyǵyna sáıkes, Túrkistan oblysy qurylyp, onyń ortalyǵy bolyp Túrkistan qalasy bekitildi. Bul taǵdyrly sheshim qoǵamnyń barlyq salasyna tyń serpin beredi degen oıdamyn. Sebebi, jańa oblys jańa múmkindikterge, bıik shyńdarǵa jeteleıdi. Úkimettik emes uıymdar da osy sátti paıdalanyp, jańa oblysty órkendetýge atsalysýlary tıis. Búginde jańadan qurylǵan Túrkistan oblysynda 738 qoǵamdyq birlestik tirkelgen. Aýdan, qalalardaǵy úkimettik emes uıymdardyń jumysyn jandandyrý, qarjylaı qoldaý boıynsha tıisti jumystar atqarylýda. Búgingi forýmda elimizdi, qasıetti Túrkistanymyzdy túletetin, qoǵamǵa tyń kúsh beretin uly bastamalar men ıgi isterdiń negizi qalanady dep senemin. Al, úlken ister osyndaı keleli basqosýlardaǵy bastamalardan týyndaıtyny sózsiz», - dedi Janseıit Túımebaev. 

Aımaq basshysy sondaı-aq birqatar úkimettik emes uıym ókilderine Alǵys hat tapsyrdy.  Jıynda «Túrkistan oblysynyń Azamattyq Alıansy» zańdy tulǵalardyń qaýymdastyq nysanyndaǵy birlestiginiń tóraǵasy Sháripbek Jamalbek azamattyq qoǵamdy damytý baǵytyndaǵy oılaryn aıtyp, alıanstyń atqarǵan jumystarymen tanystyrdy. Forýmda budan ózge QR Qoǵamdyq damý mınıstrliginiń Azamattyq qoǵam isteri komıteti tóraǵasynyń orynbasary Baqytjan Narymbetov, «Qazaqstannyń Azamattyq Alıansy» zańdy tulǵalar birlestiginiń prezıdenti Asylbek Qojahmetov, «Chernobyl odaǵy» qoǵamdyq birlestiginiń tóraǵasy Baqytjan Áshirbaev, belgili saıasattanýshy,  «Qazaqstannyń Azamattyq Alıansy» zańdy tulǵalar birlestiginiń vıtse-prezıdenti Dos Kóshim jáne ózge de azamattar sóz sóılep, úkimettik emes uıymdardyń jumysyn jandandyrý jónindegi usynystaryn jetkizdi. Úkimettik emes uıymdardyń bedeli men áleýetin kóterý, Túrkistandy gúldendirý úshin qoǵamdyq birlestikterdi usynysy jáne  bılik tarapynan azamattyq qoǵamdy damytý úshin qandaı qoldaý qajet degen suraqtar tóńireginde keleli pikirler men usynystar aıtyldy.

Azamattyq forým aıasynda áleýmettik ıdeıalar men jobalar jármeńkesiniń jeńimpazdary men júldegerleri marapattaldy. Jıyn sońynda spıkerlerge suraqtar qoıylyp, respýblıkalyq VIII azamattyq forýmǵa baratyn delegattardyń tizimi bekitildi.