Túrkistandy damytýdyń keshendi jospary halyqtyń turmys sapasyn arttyrady – Asqar Mamın

NUR-SULTAN. QazAqparat –Úkimet basshysy Asqar Mamın Túrkistan oblysyn áleýmettik-ekonomıkalyq damytýdyń 2021-2025 jyldarǵa arnalǵan keshendi jospary halyqtyń turmys sapasy men ál-aýqatyn arttyrýǵa múmkindik beretinin atady, dep habarlaıdy QazAqparat tilshisi.

«Halyq sýmen jabdyqtaý qyzmetterimen 100%, gazben jabdyqtaý qyzmetterimen 85,4% qamtamasyz etiletin bolady. AÓK salasynda bes jyl ishinde 100-ge jýyq jobany iske asyrý josparlanyp otyr, bul jalpy ónim kólemin 729 mlrd-tan 1,3 trln teńgege deıin arttyrýǵa jáne eńbek ónimdiligin 2,5 esege arttyrýǵa múmkindik beredi. Bes jyl ishinde 5 mln sharshy metrge jýyq turǵyn úı, 130 jańa mektep, 10 densaýlyq saqtaý nysanyn, rýhanı-mádenı ortalyq jáne basqa da áleýmettik sala nysandaryn salý josparlanǵan», - dedi Premer-Mınıstr Úkimet otyrysynda.

Asqar Mamın Túrkistan, Shymkent jáne Tashkent qalalaryn baılanystyratyn júrdek temirjol magıstralin tartý, Túrkistan qalasynda jańa temirjol men avtobeketter salý josparynyń keleshegi zor ekenin aıtty.

«Atalǵan sharalar jalpy óńirde ónerkásip kólemin 35%-ǵa, eńbek ónimdiligin 52%-ǵa arttyrýǵa jol ashady. Týrıster aǵyny jylyna 1,2 mln-nan 2,5 mln adamǵa deıin artady. Keminde 40 myń jańa jumys orny qurylady. «Keshendi jospardy iske asyrýdyń 5 jyly ishinde 3,6 trln teńgege 142 is-shara oryndalady. Túrkistan oblysynyń ekonomıkasy 5 jylda 1,5 ese ósedi», — degen Úkimet basshysy keshendi jospardyń ýaqytyly ári sapaly oryndalýyn tapsyrdy.