Túrkistandy damytý arqyly túrki áleminiń yntymaǵyn nyǵaıtamyz - Ialchyn Topchý

NUR-SULTAN. QazAqparat – Túrkııa Prezıdentiniń bas keńesshisi Ialchyn Topchý Elbasy Nursultan Nazarbaevqa túbi bir elderdiń yntymaǵyn nyǵaıtýǵa qosqan úlesi úshin alǵys bildirdi, dep habarlaıdy QazAqparat tilshisi.

«31 naýryzda TMYK-tyń beıresmı sammıti ótti. Biz onda túrki halyqtarynyń birligi jóninde másele kóterdik. Barlyq túrki tildes halyqtar jáne túrki álemi birlesip, óziniń yntymaqtastyǵyn nyǵaıta túsýi tıis. Túrkistandaǵy sammıtte qabyldanǵan sheshimderdiń mańyzy erekshe. Ol tek túrki tildes memleketter úshin ǵana emes, basqa óńirler úshin de óte eleýli», - dedi Túrkııa ókili «Túrkistan – túrki áleminiń rýhanı astanasy» atty halyqaralyq beınekonferentsııada.

Túrki áleminiń birlikte bolýy dál qazirgi kezeńde mańyzdy ekenin ataǵan Ialchyn Topchý Elbasynyń baýyrlas elderdiń berekesin uıytýdaǵy eńbegine aıryqsha toqtaldy.

«Biz kúsh-jigerimizdi bir arnaǵa baǵyttaı otyryp, túrki áleminiń ortaq biryńǵaı álem bolǵanyn qalaımyz. Túrki keńesiniń qurmetti tóraǵasy, Elbasy Nursultan Nazarbaev túrki yntymaqtastyǵyn damytýda óte kóp jumysty júzege asyrdy. Sondyqtan onyń qajyrly eńbegi úshin alǵys bildirgim keledi. Túrki áleminiń aqsaqaly, qurmetti Nursultan Ábishuly Nazarbaev Túrkistandaǵy beıresmı sammıtte birneshe bastama kótergen bolatyn. «Túrkistan túrki áleminiń rýhanı astanasy bolsyn» degen izgi tilegin jetkizdi. Túrkistan qalasyn damytý arqyly biz ortaq qundylyqtarymyzdy jandandyryp, túrki áleminiń yntymaǵyn nyǵaıta túsemiz. Túrki áleminiń birtektiligi óte mańyzdy. Elbasynyń qajyrly eńbeginiń, mándi bastamalarynyń arqasynda Uly dalanyń mańyzdy qundylyqtary qaıta jańaryp, túlep jatyr», - dedi Túrkııa Prezıdentiniń keńesshisi.

Atalmysh sharada Syrtqy ister mınıstriniń birinshi orynbasary Shahrat Nuryshev Elbasynyń Baký sammıtinde kótergen usynystary Túrkistanda maquldanǵanyn, endi Ystanbul sammıtinde rásimdeletinin aıtty.