Túrkistandy áleýmettik-ekonomıkalyq damytýdyń keshendi jospary talqylandy
TÚRKІSTAN. QazAqparat - Túrkistanda QR Premer-Mınıstri Asqar Mamınniń tóraǵalyq etýimen selektorlyq rejimde ótken jıynda Túrkistan qalasynda salynatyn nysandardyń qurylys barysy talqylandy, dep habarlaıdy QazAqparat tilshisi.
Qurylysy bastalǵan nysandarǵa jaýapty oblys ákimderi basqosýda jumystyń barysyn aıtyp ótti. Aımaq basshysy Ómirzaq Shókeev kıeli shahardaǵy tarıhı-mádenı nysandardyń qurylysy men turǵyn úı máselesin, ınjenerlik-kommýnıkatsııalyq ınfraqurylymdy salý men joldardyń sapasyn jaqsartý jaıyn baıandady. Týrızm men aýyl sharýashylyǵyn jáne arnaıy ekonomıkalyq aımaqty damytý barysyn sóz etti. Basqosýda Túrkistan aımaǵyn 2024 jylǵa deıin áleýmettik-ekonomıkalyq damytýdyń keshendi josparynyń jobasyn iske asyrýǵa basa nazar aýdaryldy.
Jalpy usynylǵan qujat aıasynda 55 bilim berý, 8 densaýlyq saqtaý, 13 mádenıet jáne sport nysandaryn, sondaı-aq 13 myń otbasyǵa arnalǵan turǵyn úı salý josparlanýda. Joba júzege asqanda óńirdiń ekonomıkalyq damýyna jańa serpin beredi jáne 2017 jylmen salystyrǵanda jalpy ishki ónim 1,7 ese ulǵaıady, sondaı-aq shamamen 10 myńǵa jýyq jańa jumys ornyn qurýǵa múmkindik beredi dep kútilýde.
Óz kezeginde QR Ulttyq ekonomıka mınıstri R. Dalenov, QR Aýyl sharýashylyǵynyń birinshi vıtse-mınıstri A. Saparov, QR Indýstrııa jáne ınfraqurylymdyq damý birinshi vıtse-mınıstri K. Óskenbaev, QR Birinshi qarjy vıtse-mınıstri B. Sholpanqulov, QR Energetıka vıtse-mınıstri M. Mırzaǵalıev, QR Bilim jáne ǵylym vıtse-mınıstri B. Asylova, QR Densaýlyq saqtaý vıtse-mınıstri Q. Nadyrov, QR Mádenıet jáne sport vıtse-mınıstri E. Qojaǵapanov negizgi baǵyttardaǵy ózgerister týraly túsinikteme berdi.
