Túrkistandaǵy «Əziret Sultan» qoryq-mýzeıiniń qory 114 jədigermen tolyqty

Elbasy N.Á.Nazarbaev «Bolashaqqa baǵdar: rýhanı jańǵyrý» maqalasynda: «Ata babalarymyzdan mura bolyp qalǵan keń baıtaq jerimizdi, tarıhı-mádenı qundylyqtarymyzdy, tarıhymyzdy, izgi qasıetterimizdi saqtap jáne de jańǵyrtýymyz qajet. Óıtkeni urpaq sanasynda ulttyq rýh máńgi qalýǵa tıis» dep, tarıhı jədigerler mańyzdylyǵy men qorǵaý máselesin basa aıtqan bolatyn.

Osy oraıda, qoryq-mýzeıinde arnaıy kórme uıymdastyrylyp, onda  mýzeı janashyrlary tarıhı, etnografııalyq baǵyttaǵy kóne dúnıelerin kórmege əkeldi. Osylaısha murajaı jalpy qory 114 jádigermen tolyqty. Ata-babadan mura bolyp,saqtalyp kele jatqan qundy dúnıelerdi mýzeıge tabystaýshylar arasynda Túrkistan qalasynyń turǵyny «Ájeler» ansambliniń múshesi, qalada ótetin is-sharalardyń belsendi qatysýshysy Jaqsygúl Tólentaeva da bar. Ol mýzeıge etnografııalyq jáne bonıstıkalyq baǵyttaǵy jalpy sany 30-ǵa jýyq zat tapsyrdy.

Aıta keteıik,  "Əziret Sultan" qoryq-mýzeıi ashylǵanda nebəri 300 jádigerden quralǵan qundylyqtar qory qazirgi kúnde 24082 jádigerge jetken.

"Kórme ekspozıtsııasynda Elbasy N.Á.Nazarbaevtyń mýzeıge syıǵa tartqan quran kitabynan bastap shetel basshylarynyń tartýlary da bar. Sonymen qatar elimizdiń qoǵam qaıratkerleri, áýesqoı arheolog, mýzeı qyzmetkerleri jáne qarapaıym halyqtyń kúndelikti turmysta qoldanǵan etnografııalyq, arheologııalyq jáne jazba eskertkishteri de kezdesedi. Jyl saıyn ótip otyratyn aktsııa aıasynda Memleket jáne qoǵam qaıratkeri Ózbekáli Jánibekovtiń uly Baýyrjan Jánibekov ákesiniń jeke kitaphana qoryndaǵy 18 dana kitapty tabystaǵan bolatyn. Tabystalǵan kitaptar - sheteldik biregeı ádebıet týyndylary. Mýzeı isi men otandyq óner salasyna qatysty ərbir kitapta Ózbekáli Jánibekovtiń óz qoltańbasy bar" - deıdi mádenı ordanyń qyzmetkerleri.