Túrkistandaǵy jańa teatrda «Bórte» pesasynyń premerasy anshlagpen ótti

TÚRKІSTAN. QazAqparat - Túrkistan mýzykalyq drama teatrynda «Bórte» spektakliniń premerasy ótti, dep habarlaıdy QazAqparat.

Oǵan elimizdiń túkpir-túkpirinen óner jáne mádenıet maıtalmandary, zııaly qaýym ókilderi jáne Túrkistan qalasynyń ónersúıer qaýymy qatysty.

Jańa teatrdyń alǵashqy maýsymynyń ashylý saltanatyna Túrkistan oblysynyń ákimi Ómirzaq Shókeev arnaıy qatysyp, jurtshylyqty quttyqtady.

Túrkistandy túrki áleminiń mádenı jáne rýhanı ortalyǵyna aınaldyrý jolynda teatrdyń da mańyzy zor ekenin aıtyp, óner ujymynyń qadamyna sáttilik tiledi.

Premeraǵa arnaıy kelgen «Nur Otan» partııasy Tóraǵasynyń birinshi orynbasary Baýyrjan Baıbek te shynaıy lebizin bildirip, Elbasy jarlyǵymen jańa dáýiri bastalǵan Túrkistandaǵy ózgeristerge oń baǵasyn berdi.

Dramatýrg, QR Memlekettik syılyǵynyń ıegeri Dýlat Isabekovtyń «Bórte» spektaklinde tarıhı oqıǵalar keremet sýrettelgen.

Uly bıleýshi Shyńǵyshannyń jary Bórte hanym týraly qoıylymda ardaqty, batyr ananyń el tarıhyndaǵy orny kórsetilgen.

Jańa teatrdyń alǵashqy qoıylymynyń rejısseri Italııa mamany Karlo Shakkalýga bul qadamǵa úlken daıyndyqpen kelgen eken.

Ártisterdiń kıimderi, sahnanyń bezendirilýi óte joǵary deńgeıde boldy. Rólderdi somdaǵan Qazaqstannyń halyq ártisi Almahan Kenjebekova, QR Eńbek sińirgen qaıratkeri Leılo Bekzanar-Hanınga, QR Eńbek sińirgen qaıratkeri Alıhan Ydrysheva, Erkebulan Daıyrov, Aqbota Qaımaqbaeva, Núrken Óteýilov, Aııa Shárip jáne ózge de akterlar joǵary deńgeıde óner kórsetip, kórermenniń ystyq yqylasyna ıe boldy.

Premera sońynda Túrkistan mýzykalyq drama teatrynyń dırektory Aınur Kópbasarova Túrkistan jurtshylyǵy men qonaqtaryna joǵary deńgeıli qoıylymdar legi usynylatynyn jetkizdi.

Al «Bórte» shyǵarmasynyń avtory Dýlat Isabekov jas teatrdyń ujymyna rızashylyǵyn bildirdi.

Shyńǵyshan men Bórteniń bala kezinen bastap, uly tarıhı oqıǵalarǵa aralasý sátterinen syr shertetin spektaklge kórermen qaýym oń baǵasyn berdi.