Túrkistandaǵy jańa áýejaı qalaı salyndy
NÝR-SÝLTAN. QazAqparat – QR Indýstrııa jáne ınfraqurylymdyq damý mınıstrligi Azamattyq avıatsııa komıteti Túrkistandaǵy jańa áýejaıdyń fotosýretterin jarııalady, dep habarlaıdy QazAqparat tilshisi.
Aıta keteıik, búgin QR Tuńǵysh Prezıdenti kúnine oraı otandyq loýkoster Fly Arystan kompanııasy Túrkistan men Nur-Sultan qalalary arasyndaǵy turaqty reısin bastady.
Túrkistan halyqaralyq áýejaıyna Hazret Sultan Airport esimi berilgen.
Ǵımarattyń jalpy aýdany 905,3 gektar, jolaýshylar termınalynyń aýdany – 10,5 myń sharshy metr, ushý-qoný jolaǵynyń kólemi – 3 300h45 metr, ótkizý qabileti saǵatyna 450 jolaýshyny quraıdy. Áýejaı Túrkistan qalasynan shyǵysqa qaraı 20 shaqyrym jerde ornalasqan. Áýejaı kody: ICAO-UAIT, IATA-HSA.
Áýejaı termınalynyń aýdany 10,5 myń sharshy metrdi quraıdy. Termınal jylyna 3 mıllıonǵa jýyq jolaýshyǵa qyzmet kórsete alady. Nysan «ashyq aspan» rejıminde jumys isteıdi jáne alǵashqy halyqaralyq reısterin Ystanbul men Dýbaı qalalaryna ashý josparlanǵan.
«Birinshi kezeńde Túrkistan qalasynyń jańa halyqaralyq áýejaıynan «Fly Arystan», «Qazaq Air» jáne «SCAT» áýe kompanııalary Nur-Sultan, Almaty qalalaryna kúndelikti reıster oryndaıdy jáne túrki áleminiń rýhanı ortalyǵy retinde Túrkistan Qazaqstannyń basqa oblys ortalyqtarmen baılanysady. Halyqaralyq baǵyttardyń ishinde eń aldymen Ystanbul, Dýbaıǵa reıster ashý josparlanyp otyr. Bolashaqta basqa qalalarǵa, onyń ishinde Máskeý, Baký, Samarqand jáne basqa qalalarǵa reıster ashylatyn bolady», - dep habarlady Azamattyq avıatsııa komıteti.
