Túrkistandaǵy «Uly dala eli» rýhanı ortalyǵynyń qurylysy qyrkúıekte aıaqtalady

TÚRKІSTAN. QazAqparat – Túrkistan oblysynyń ákimi Ómirzaq Shókeev óńirge jumys saparymen kelgen Atyraý oblysynyń ákimi Mahambet Dosmuhambetovpen kezdesti. Jumys toby oblys ortalyǵynda boı kótergen «Uly dala eli» mádenı kesheniniń qurylys barysymen tanysty, dep habarlaıdy QazAqparat tilshisi.

Túrkistan shaharyn túletý maqsatynda elimizdiń árbir oblysy bir nysannan tartý etip otyrǵany belgili. Sonyń biri Atyraý oblysy ákimdigi týrızm ordasy, kıeli Túrkistan jerine sáýlet óneriniń úzdigine aınalar «Uly dala eli» rýhanı ortalyǵyn salyp berýde. Ortalyqta Qazaq handyǵynyń qurylǵanynan bastap, jańa dáýir damýyna deıingi ártúrli taqyrypty ashatyn 9 tarıhı – zamanaýı zaldar ashylady.

Qurylys basynda bolǵan Atyraý oblysynyń ákimi mádenı ortalyqta zamanaýı múmkindikterdi, ıaǵnı ınnovatsııalyq tehnologııalardy barynsha qoldanýdy usyndy.

Alyp qurylys alańyna aınalǵan oblys ortalyǵynda elimizdegi iri qurylys kompanııalary kıeli shahardy túletý jolynda kúndiz-túni ter tógýde. Atyraý oblysy ákimdiginiń syıy qyrkúıek aıynda aıaqtalýy tıis. 0,8 ga jerde boı kóterip jatqan ortalyqtyń aýmaǵy 6200 sharshy metrdi quraıdy. Qazirgi tańda qurylys jumystary josparǵa saı júrgizilýde.