Túrkistandaǵy teatr sahnasynan tehnıkalyq aqaý shyqty

TÚRKІSTAN. QazAqparat - Teatrda maýsymǵa josparlaǵan Trıptıh: «Gamlet», «Qaragóz», «Faýst» premerasy qazan aıyna shegerildi, dep habarlaıdy QazAqparat tilshisi.

Áleýmettik jelide Túrkistan mýzykalyq drama teatryna qatysty tarap jatqan aqparattarǵa qatysty teatr basshylyǵy jaýap berdi.

Aqparatta «2 tonnalyq akvarıýmdy kótere almaı synyp ketti» degen jazbalardyń jalǵan ekendigi aıtylǵan.

«Teatr sahnasymen jalǵasyp jatqan qozǵalystaǵy orkestr shuńqyrynyń jyljymaly mehanızminiń buzylýyna baılanysty jáne arnaıy mamandardan qurylǵan komıssııanyń sheshimimen sahnanyń aldyńǵy betin paıdalanýǵa (aqaý tetikti aldyryp aýystyrǵansha) tıym salyndy. Sebebi, rejısser sheshimine sáıkes kóp paıdalanylatyn dekoratsııalar ornalasqan jer orkestr shuńqyrynyń mańaıy bolyp tabylady»,-delingen habarlamada.

Bul aqaýlyqqa osy teatr qurylysyn júrgizgen kompanııa kináli emes deıdi mamandar. ıAǵnı, orkestr shuńqyryna ornatylǵan tórt kóterý mehanızminiń bireýiniń isten shyǵýy sebep bolyp otyr. Bul qurylǵynyń kepildik merzimi ótpegendikten, orkestr shuńqyry mehanızmin ornalastyrǵan kompanııa aqaý tetigine shetelge tapsyrys berip qoıǵan. Jańa teatr maýsymyna deıin jańartylyp, sahna tolyq paıdalanýǵa berilýi kerek.

«Trıptıh: «Gamlet», «Qaragóz», «Faýst» premerasynda paıdalanatyn dekoratsııalardyń salmaǵy sáıkes kelmeýine baılanysty repetıtsııany toqtatyp, premerany kúzge shegerýge týra keldi.

Teatr sahnasy (orkestr shuńqyrynan bólek) spektaklder qoıýǵa jaramdy ekenin habarlaımyz»-deıdi teatrdyń baspasóz qyzmeti taratqan habarlamada.