Túrkistandaǵy salynyp jatqan joldardyń sapasy únemi baqylaýda bolady – ákim
TÚRKІSTAN. QazAqparat – Túrkistandaǵy jaıaý júrginshiler joldarynyń sapasy tómendemeıdi, baqylaýda bolady. Bul týraly qala ákimi Rashıd Aıýpov oblys ortalyǵyndaǵy aıaq joldar men velojoldar salý jumysymen tanysý barysynda málimdedi, dep habarlaıdy QazAqparat tilshisi.
Shahar basshysynyń sózinshe, istelip jatqan jumystardyń sapasy boıynsha shaǵymdar kóptep túsken. Tekserý kezinde olardyń sapasyna jaýapty kompanııalar bolsa da, kemshilikterdiń bar ekeni belgili boldy. Mundaı olqylyqtardy óz kózimen kórgen ákim olardyń qaıta sapaly túrde salynatyndyǵyn basa aıtty. Bul másele boıynsha, qalalyq jolaýshylar kóligi jáne avtomobıl joldary bóliminiń basshysyna birqatar tapsyrmalar berip, nazarǵa alýyn eskertti. «Kóptegen turǵyndar óz shekarasynan asa jerlerdi qorshap alyp, aǵash ekken jerler óte kóp. Olarmen kelisip, qorshaýlar alynyp tastalady. Ondaǵy aǵashtardyń janyna oryndyqtar, beınekameralar men jaryqshamdar qoıyp, sol aýmaqtyń halqy serýendeıtin kishi alleıalardy jandandyratyn bolamyz. Osyndaı jobada 20 shaqty kishi alleıalar salýdy kózdep otyrmyz. Jalpy uzyndyǵy 5 km-di quraıtyn bolady. Bul dúnıeler qorshaýlardyń ornyna salynyp, nátıjesinde turǵyndarǵa jaıly, yńǵaıly orta qalyptasatyn bolady», – dedi shahar basshy. Ákimniń sózinshe qaladan shetki aýmaqtar da tasada qalmaıdy. Keler jyly balalarǵa arnalǵan oıyn alańdary men kishi, úlken saıabaqtar salý josparlanǵan. Maqsat – tek saıabaq salý ǵana emes, kásipkerlerdi tartyp, jumys oryndaryn ashý bolyp otyr.
