Túrkistandaǵy reıd: Qandastarǵa «oralman» mártebesin alý joldary túsindirilýde
«QR Tuńǵysh Prezıdenti N.Nazarbaev 2019 jylǵy 16 naýryzda «Oralman mártebesiniń merzimin ótkizip alǵan etnıkalyq qazaqtarǵa jeńildetilgen túrde QR azamattyǵyn berýdi» tapsyrǵan bolatyn. Túrkistan oblystyq Polıtsııa departamentiniń bastyǵy, polıtsııa general-maıory Q.Dálbekov atalǵan júıe boıynsha kóshi-qon qyzmeti mamandaryna keshendi is-sharalardy júzege asyrýdy bekitip berdi. Osyǵan oraı, oblys aýmaǵynda 2019 jylǵy 2-5 shilde aralyǵynda «Oralman» jedel-profılaktıkalyq is-sharasy ótkizilip, tarıhı Otanǵa oralǵan azamattar arasynda túsindirý jumystary júrgizildi», - dedi PD-dan.
Reıd barysynda óńirdiń tártip saqshylary etnıkalyq qazaqtarǵa oralman mártebesin alýǵa nemese sozýǵa bolatyndyǵy jóninde túsindirme jumystaryn júrgizdi.
«Іs-shara aıasynda jalpy 567 úı tekserilip, onyń ishinde 275 etnıkalyq qazaq anyqtaldy. Olardyń 27-sinde «Oralman» kýáliginiń merzimi ótkeni belgili boldy», - dep málim etti vedomstvodan.
Profılaktıkalyq shara ótkizilgen úsh kúnde «Qazaqstan Respýblıkasynyń azamattyǵyn alýdan, oralman kýáliginiń merzimin uzartýdan» túrli sebeppen 21 tulǵa bas tartqan. 33 tulǵaǵa qatysty «oralman» mártebesi uzartyldy. Budan basqa, 32 etnıkalyq qazaq QR azamattyǵyna qabyldanyp, qujattary qaralýda.
Eske sala ketsek, «oralman» mártebesiniń ýaqyty ótip ketken qandastar, ony uzartý úshin jergilikti atqarýshy organǵa júginýi tıis. Keıin jeńildetilgen túrde azamattyq alý úshin qujattaryn tapsyrýy qajet.
Qazirgi tańda jedel-profılaktıkalyq shara jalǵasyn tabýda.
