Túrkistandaǵy psıxonevrologııalyq dıspanserdiń basshylyǵy jumystan qýyldy

ASTANA. QazAqparat - Búgin Úkimet úıinde ótken baspasóz máslıxatynda QR Densaýlyq saqtaý mınıstri Eljan Birtanov Ońtústik Qazaqstan oblysyndaǵy psıxonevrologııalyq dıspanserde 60 naýqastyń jappaı týberkýlezǵa shaldyǵý sebepterin ashyp berdi, dep habarlaıdy QazAqparat tilshisi.

«Iá, Ońtústik Qazaqstan oblysynda týberkýlezben jappaı ýlaný oqıǵasy boldy. Alaıda atalǵan dıspanser áleýmettik ońaltý mekemesine jatady. Bul medıtsınalyq mekeme emes. Ol jerde psıxıkalyq aýrýlarǵa shaldyqqandardy emdeıdi. Oǵan týberkýlezdiń ashyq formasy bar naýqastar túskennen keıin aýrý basqa adamdarǵa tarap ketken», - deıdi Birtanov.

Onyń aıtýynsha, qazirgi kezde týberkýlezǵa shaldyqqandardyń barlyǵy arnaıy emdeý mekemelerine jatqyzyldy. Al oqıǵa orny - Túrkistannyń ózine arnaıy respýblıkalyq komıssııa attandy. Qazirgi kezde psıxonevrologııalyq dıspanserde zararsyzdandyrý sharalary júrgizilip jatyr.

«Ol mekemede sanıtarlyq-epıdemıologııalyq erejeler buzyldy. Osyǵan baılanysty dıspanser basshylyǵy jumystan qýyldy. Naýqastar, medqyzmetkerler - barlyǵy 500 adam arnaıy tekseristen ótti», - dep atap kórsetti mınıstr.