Túrkistandaǵy psıhonevrologııalyq dıspanserde ókpe aýrýyna shaldyqqandar sany 65 adamǵa jetti
ShYMKENT. QazAqparat - Ońtústik Qazaqstan oblysy Túrkistan qalasyndaǵy psıhonevrologııalyq dıspanserden ókpe qurt aýrýyna shaldyqqandar sany 65 adamǵa jetti. Taǵy tórt naýqas qosymsha tekserýler nátıjesinde anyqtalǵan. 24-i derttiń ashyq túrimen aýyratyny anyqtaldy. Bul týraly búgin oblystyq densaýlyq saqtaý basqarmasynyń basshysy Muqan Egizbaev málimdedi , - dep habarlaıdy QazAqparat HAA tilshisi.
«65 naýqastyń 50-i - aýrýdy jańadan juqtyrǵandar. Qazirgi tańda olardyń barlyǵy oblys aýmaǵyndaǵy emdeý mekemelerine jiberilgen. Atap aıtqanda oblystyq jáne Saryaǵash, Arys aýdandyq týberkýlezge qarsy dıspanserlerge aýystyryldy. Basym kópshiligi, ıaǵnı 56 naýqas, Arys aýdanyndaǵy emdeý mekemesine jatqyzylǵan. Budan bólek dıspanserdegi taǵy 75 aýrý kúdikti retinde Saryaǵash aýdanyndaǵy dıspanserge jiberildi. Ortalyqtaǵy ózge naýqastar túgel medıtsınalyq tekserýden ótkizilip jatyr. Bul jumystar ary qaraı jalǵasa beredi», - dedi Egizbaev.
Basqarma basshysynyń sózinshe, Túrkistandaǵy arnaıy áleýmettik qyzmet kórsetý ortalyǵyndaǵy naýqastar jappaı dertke shaldyqqan soń basqa da osyndaı 6 emdeý mekemesi men ınternattaǵy 1140 naýqas medıtsınalyq tekserýden ótkizilgen. Nátıjesinde Kóksáıek múgedek balalar ınternatynan 7 balanyń jáne oblys ortalyǵyndaǵy múgedekterge arnalǵan ınternattan 2 naýqastyń ókpe qurt aýrýyna shaldyqqany belgili boldy. Qazir olarǵa da tıisti em-dom sharalary júrgizilýde.
«Qazirgi tańda 793 naýqas pen 300-den astam medıtsınalyq qyzmetker tekserýden ótkizildi. Kúdik týǵyzǵan naýqastar flıýrodan keıin rentgennen ótkizilýde. Sondaı-aq, taǵy da bilim berý basqarmasyna qarasty 22 ınternat bar eken. Olar kezeń-kezeńimen túgeldeı tekserýden ótkiziletin bolady. Osyndaı aýrýlardy ary qaraı boldyrmas úshin búginnen bastap 22 nysan tekserýden ótkiziledi», - dedi basqarma basshysy.
«Osy oqıǵa boıynsha úsh komıssııa tekserý júrgizdik. Sonyń qorytyndysy boıynsha bes qyzmetkerge shara qoldandy. Túrkistandaǵy týberkýlezge qarsy mekemeniń bas dárigeri jumystan bosatyldy. Sol ortalyqtaǵy úsh dáriger qyzmetinen bosatyldy. Odan bólek Túrkistan qalasyndaǵy emhananyń bas dárigeri jumystan bosatyldy. Biz qazirgi tańda osyndaı jappaı aýrýǵa shaldyǵý máselesi týyndamas úshin mundaı mekemelerdi basqarma qaramaǵyna ótkizý úshin mınıstrlikke hat jazyp jatyryz»,-dedi M.Egizbaev.
