Túrkistandaǵy perınataldyq ortalyq mańyzdy medıtsınalyq quralmen jabdyqtaldy
TÚRKІSTAN. QazAqparat – Túrkistan oblysyndaǵy №3-shi perınataldyq ortalyǵy jańa týǵan nárestelerdiń ómiri úshin mańyzdy medıtsınalyq qural-jabdyqpen qamtyldy.
Atalǵan jabdyq muqııat jáne óte dál mólsherlememen balanyń dene qyzýyn tómendete alady, dep habarlaıdy QazAqparat tilshisi.
Terapevttik gıpotermııaǵa arnalǵan TecoTerm Neo jáne elektroentsefalografııa apparattary júıke júıesiniń zaqymdanýymen týǵan sábılerge ómirleriniń alǵashqy sátterinde gıpotermııalyq emdik shara jasaıdy. Qan aınalymyn jaqsartyp, sábılerdiń bas mıy jasýshalarynyń nemese zaqymdanǵan bólikteriniń qalpyna kelýin baqylaýǵa múmkindik beredi.
Nebári 6 keli bolatyn jabdyqtyń quny 27 mıllıon teńge turady. Germanııada shyǵarylǵan medıtsınalyq jabdyqty perzenthanaǵa «AıALA» qaıyrymdylyq qory Qazaqstan halyq banki AQ qarjylaı qoldaýymen tabystap otyr. Qor bul medıtsınalyq jabdyq óńirde gıpoksııanyń aýyr túrlerimen baılanysty sábıler ólimin tómendetýge kómektesetinine senimdi.
Búginde terapevttik gıpotermııa - nárestelerdiń bas mıyn qorǵaýdyń álemde moıyndalǵan dári-dármekti qoldanýsyz, negizgi fızıkalyq ádisi retinde qaralady. Ásirese shala týylǵan nárestelerdi kútýde asa mańyzdy.
«Sábıler ólimin jáne múgedektigin qysqartý jónindegi jobalardy iske asyrý bizdiń qor jumysynyń negizgi basymdyǵy bolyp tabylady. Bul jabdyq Túrkistan oblysyndaǵy sábılerdiń tirshilikke qabilettiligin jáne bala týý kórsetkishterin jaqsartýǵa kómektesetinine senimimiz mol», - deıdi atalǵan qordyń prezıdenti Aıdan Súleımenova.
Aıta keteıik, Túrkistan oblystyq №3-shi perınataldyq ortalyǵy 225 naýqasqa laıyqtalǵan. Óńirde nárestelerdiń dúnıege kelý kórsetkishi jyl saıyn artyp keledi. Máselen, byltyr dál osy perzenthanada 8 myńǵa jýyq sábı ómirge kelgen bolsa, olarda 38-i aýyr asfıktsııa dıagnozy anyqtalǵan. Sondyqtan gıpotermııa sııaqty jabdyqtyń bolýy sapaly kómek kórsetý úshin óte mańyzdy. Óz kezeginde perzenthananyń dárigerleri óz taraptarynan jańashyldyqqa qyzýǵyshylyq tanytyp, Koreıa, Lıtva, Reseı memleketterinde biliktilik arttyrǵan. Jańa týǵan nárestelerge sapaly em kórsetý maqsatynda reanımatsııalyq palatalarda emdeý – profılaktıkalyq mýzykoterapııasy uıymdastyrylǵan. Jansaqtaý bólimderi arnaıy kengýrý kreslolarymen jabdyqtalǵan. Jalpy, óńirde ótken jyly 55 myńnan astam sábı dúnıege kelgen.
