Túrkistandaǵy ózbek etnomádenı birlestigi Maqtaral turǵyndaryna 10 mln teńgege kómek kórsetti
MAQTAARAL. QazAqparat – Maqtaraldaǵy tótenshe jaǵdaı qazaqstandyqtardyń tatýlyǵy men birligin, qıyn qystaý kezeńde bir qoldyń salasyndaı birige alatyndyǵyn taǵy bir dáleldedi.
Óńirdegi belgili kásipker, Qazaqstan halqy Assambleıasynyń múshesi Bahadyr Irısmetov basqaratyn Túrkistan qalalyq ózbek etnomádenı birlestigi maqtaraldyqtarǵa 9 mln 862 myń teńgeniń kómek kerýenin jóneltti, dep habarlaıdy QazAqparat tilshisi.
Gýmanıtarlyq kómektiń ishinde azyq-túlikter men kıim-keshekter, turmysqa qajetti gıgıenalyq zattar men jıhazdar bar. Atalǵan qoǵamdyq birlestik Maqtaaral aýdanynda tótenshe jaǵdaı jarııalana salysymen jedel shtab quryp, evakýatsııalanǵan azamattarǵa jan-jaqty kómek kórsetý úshin kerek-jaraqtyń bárin kúndelikti jınaı bastaǵan.
«Maqtaaraldaǵy sý tasqyny Myrzashól jurtynyń ǵana qaıǵysy emes, búkil halyqtyń qaıǵysy. Osyndaı qıyn sátte barsha halyq Maqtaaral turǵyndarymen birge ekendikterin kórsetip, qoldan kelgen járdemin berip jatyr. Túrkistan qalalyq etnomádenı birlestik ókilderi de kún-tún demeı osy eldiń tez eńse tikteýine tileýles bolyp otyr. Qazir evakýatsııalyq ortalyqtarda ornalasqan azamattardyń suranysy azyq-túlik emes kıim-keshek, kórpe-tósek pen gıgıenalyq zattar. Osy jaıtty eskerip, osy qajetti zattardy ákelýdi jón kórdik. Biz jeńbeıtin qıyndyq joq»,- deıdi Qazaqstan halqy Assambleıasynyń múshesi Bahadyr Irısmetov.
Túrkistandyq etnomádenı birlestik ókilderi jóneltken kómek kerýenindegi júk búgin oblystyq shtabtyń qoımasyna túsirildi. Jurt amanatyn aman-esen jetkizip bergen birlestik jetekshileri mundaı qaıyrymdylyq sharalary aldaǵy ýaqytta da jalǵasatynyn aıtady.
