Túrkistandaǵy ózbek etno-mádenı birlestigi maqtaraldyqtarǵa 10 mln teńgeniń kómegin jiberdi

MAQTAARAL. QazAqparat – Maqtaraldaǵy tótenshe jaǵdaı qazaqstandyqtardyń tatýlyǵy men birligin, qıyn qystaý kezeńde bir qoldyń salasyndaı birige alatyndyǵyn taǵy bir dáleldedi. Óńirdegi belgili kásipker, Qazaqstan halqy Assambleıasynyń múshesi Bahadyr Irısmetov basqaratyn Túrkistan qalalyq ózbek etno-mádenı birlestigi maqtaraldyqtarǵa 9 mln 862 myń teńgeniń kómek kerýenin jóneltti, dep habarlaıdy QazAqparat tilshisi.

Gýmanıtarlyq kómektiń ishinde azyq-túlikter men kıim-keshekter, turmysqa qajetti gıgıenalyq zattar men jıhazdar bar. Atalǵan qoǵamdyq birlestik Maqtaaral aýdanynda tótenshe jaǵdaı jarııalana salysymen jedel shtab quryp, evakýatsııalanǵan azamattarǵa jan-jaqty kómek kórsetý úshin kerek-jaraqtyń bárin kúndelikti jınaı bastaǵan.

«Osyndaı qıyn sátte barsha halyq Maqtaaral turǵyndarymen birge ekendikterin kórsetip, qoldan kelgen járdemin berip jatyr. Túrkistan qalalyq etnomádenı birlestikterdiń ókilderi de kún-tún demeı osyndaǵy halyqtyń tez eńse tikteýine tileýles bolýda. Qazir evakýatsııalyq ortalyqtarda ornalasqan azamattardyń suranysy azyq-túlik emes kıim-keshek, kórpe-tósek pen gıgıenalyq zattar. Osy jaıtty eskerip, biz naǵyz qajetti zattardy ákelýdi jón kórdik. Biz jeńbeıtin qıyndyq joq»,- deıdi Qazaqstan halqy Assambleıasynyń múshesi Bahadyr Irısmetov.

Túrkistandyq etno-mádenı birlestik jóneltken kómek kerýenindegi júk búgin oblystyq shtab qoımasyna túsirildi. Jurt amanatyn aman-esen jetkizip bergen birlestik jetekshileri mundaı qaıyrymdylyq sharalary aldaǵy ýaqytta da jalǵasatynyn aıtady.