Túrkistandaǵy órt: Turǵymbaev pen Birtanov kúıik shalǵan adamdardyń jaǵdaıyn baryp bildi
ARYS. QazAqparat – Túrkistan qalasynda bolǵan órt saldarynan jaraqat alǵan oblystyq tótenshe jaǵdaı qyzmetkerleriniń jaǵdaıyn bilýge QR Іshki ister mınıstri, polıtsııa general-leıtenanty Erlan Turǵymbaev pen QR Densaýlyq saqtaý mınıstri Eljan Birtanovtar keldi. Olar Túrkistan oblysynyń ortalyq aýrýhanasyna baryp, naýqastarmen kezdesti, dep habarlaıdy QazAqparat tilshisi.
Eki mınıstr de aýrýhanada kúıik shalyp jatqan 6 órt sóndirýshimen tildesip, olardyń din-amandyǵy men densaýlyqtarynyń jaqsarǵanyna kózderin jetkizdi. Qajet bolǵan barlyq kómekterdiń der kezinde kórsetiletinin atap ótti.
Eske sala ketsek, keshe 10 qyrkúıek kúni shamamen saǵat 18.25-te Túrkistan qalasyndaǵy «Roıal-grand» qonaqúıi órtendi. Oqıǵa ornyna polıtseıler men TJK qyzmetkerleri jedel jetip, jaqyn mańdaǵy aýmaqtardy qorshaýǵa alyp, qonaq úıdiń qyzmetkerleri men qonaqtardy evakýatsııalady. Órtten qutqarý jumystary barysynda jalpy 50 adam qaýipsiz jerge shyǵaryldy.
Órt kezinde patrýldik polıtsııa batalon komandıriniń orynbasary, polıtsııa maıory Qanat Rakyshev pen Túrkistan qalalyq tótenshe jaǵdaılar basqarmasynyń azamattyq qorǵaý maıory Bolat Túımenov adam shyǵynyn keltirmes úshin barlyq bólmelerdi tintip shyqty. Nátıjesinde tártip saqshylary órt qaýmalaǵan ǵımarattan 4 jasar qyzdy jáne Túrkııanyń eki azamatyn qutqardy. Tótenshe jaǵdaıdan qaza bolǵandar joq.
Órtti aýyzdyqtaý barysynda Túrkistan oblysy TJQ-niń 5 qyzmetkeri jaraqattanyp, túrli dárejedegi kúıik jáne jaraqattarymen ortalyq aýrýhanaǵa jatqyzyldy. Olardyń arasynda jansaqtaý bóliminde aýyr halde jatqan Túrkistan oblysy TJQ QB bastyǵynyń orynbasary, azamattyq qorǵaý podpolkovnıgi Baqytjan Abdýǵapparov bar bolatyn. Búgingi tańda onyń jaǵdaıy jaqsarǵan.
Qazirgi tańda Túrkistan qalalyq polıtsııa basqarmasynyń tergeýshilerimen qonaqúıdiń órtke oranýy boıynsha QR Qylmystyq kodeksiniń 292-baby «Órt qaýipsizdigi talaptaryn buzý» boıynsha sotqa deıingi tergep-tekserý amaldary júrgizilýde. Saraptamalar taǵaıyndaldy. Tergep-tekserý barysynda oqıǵanyń barlyq mán-jaıy, onyń ishinde órttiń shyǵý sebebi anyqtalatyn bolady.
