Túrkistandaǵy nysandardyń qurylysyna otandyq taýarlar qoldanylmaıtyny anyqtaldy

TÚRKІSTAN. QazAqparat – Túrkistan oblysy kásipkerler palatasy qurǵan arnaıy monıtorıng toby oblys ortalyǵyndaǵy birneshe qurylys nysanyn aralady. Tekserý barysynda memlekettik satyp alýdaǵy birqatar zańbuzýshylyq anyqtaldy, dep habarlaıdy QazAqparat tilshisi.

Otandyq taýar óndirýshilerdi qoldaý maqsatynda qurylǵan top «qarapaıym zattar ekonomıkasy» baǵdarlamasy aıasyndaǵy tenderden keıingi baqylaýdy júrgizdi. Olar Túrkistan qalasyndaǵy 900 oryndyq mektep qurylysy men ákimshilik-iskerlik ortalyǵyndaǵy býlvar salý jumysymen tanysty. Jańadan boı kóterip jatqan drama teatrdyń qurylysy men qolónershiler ortalyǵyn rekonstrýktsııalaý, Kentaý qalasyndaǵy Oranǵaı aýyldyq okrýginde ornalasqan «Keńsaı-Qosqorǵan-2» sý qoımasynyń qurylysyn aralap kórdi.

«Monıtorıng nátıjeleri boıynsha, qurylys barysynda plastık terezeniń profıli men keıbir qurǵaq qurylys qospasy, ımporttyq materıaldar paıdalanylatyny anyqtaldy. Alaıda, joǵaryda atalǵan barlyq nomenklatýra boıynsha otandyq taýar óndirýshiler bar ekeni belgili»,- deıdi oblystyq Kásipkerler palatasy satyp alý jáne jergilikti qamtý bóliminiń basshysy Sáttar Igenov.

Máselen, Oranǵaı aýyl okrýginde salynyp jatqan «Kensaı-Qosqoǵan-2» sý qoımasynyń qurylysyn júrgizip jatqan merdiger reseılik materıaldy qoldanyp jatqany anyqtaldy. Elimizde atalǵan qurylys materıalyn óndiretin 5 mekeme bar ekenin atap ótý kerek. Monıtorıng nátıjesimen qurylys nysanynyń tapsyrys berýshisine merdiger mekememen birlesip, otandyq taýarlardy paıdalanýdy qarastyrý tapsyryldy.