Túrkistandaǵy nysandar qurylystary óndiristik kestege sáıkes júrgizilýde
TÚRKІSTAN. QazAqparat – Túrkistan oblysynyń ákimi Ómirzaq Shókeev qurylysshylarmen kezdesip, oblys ortalyǵyndaǵy qurylys alańdaryn aralap kórdi. Aımaq basshysy qurylys jumystarynyń barysyn tekserip, merdiger kompanııa jaýaptylaryna jumys qarqynyn tezdetýdi tapsyrdy, dep habarlaıdy QazAqparat tilshisi.
Ómirzaq Shókeev qurylys barysynda saqtyq sharalaryn saqtaı otyryp, keı nysandardaǵy jumystardy táýlik boıy júrgizýge bolatyny atap ótti. Sondaı-aq jańadan salynyp jatqan ǵımarattardyń sapasyna basa nazar aýdarýdy eskertti.
«Jumys aýqymy óte úlken, ony jaqsy túsinemiz. Alaıda qarjy der kezinde bólingen soń, jumys toqtamaý kerek. Jumys kestesinen qalys qalýǵa bolmaıdy. Qajet bolǵan qurylys nysandaryna qosymsha kúsh tartylyp otyr. Kún saıynǵy tekserýimizden keıin jumys alǵa jyljyp jatyr. Onyń ústine keıbir qurylys nysandary táýlik boıy jumys isteýge kóshýge ábden bolady», – dedi Ómirzaq Shókeev.
Aıta keteıik, Túrkistannyń ákimshilik-iskerlik ortalyǵynyń qurylysy qarqyndy júrgizilýde. Mundaǵy salynyp jatqan arendalyq jáne nesıelik turǵyn úıler tamyz aıynda tapsyrylady dep josparlanǵan. Onyń ishinde memlekettik qyzmetkerlerdi turǵyn úımen qamtamasyz etý maqsatynda 62 turǵyn úıdi bıyl tapsyrý kózdelip otyr. Óz kezeginde óńir basshysy barlyq turǵyn úılerdiń syrtqy kórinisi biryńǵaı bolýyna basa nazar aýdarýdy mindettedi. Basym bóligi ashyq tústi travertın men aq mármár taspen qaptalatyn boldy. Al, basqarmalar men departamentterdiń ǵımarattary, Kongress ortalyǵynda qurylys aıaqtalyp keledi. Qazirgi tańda ishki árleý, ınjenerlik jelilerin montajdaý jáne syrtqy abattandyrý jumystary júrgizilýde. Qurylys eki aýysymda júrip jatyr. Nur-Sultan alańynda qurylys jumystary tolyq aıaqtalyp, abattandyrylýda. Oqýshylar saraıy men stadıonnyń, basseıni bar sport kesheni de bitýge taıaý. Qalalyq saıabaqta abattandyrý, drenajdyq júıe, sý burqaqtar, amfıteatr, attraktsıondar ornatý, sándik sý aıdyny jáne kóshetter otyrǵyzý jumystary júrgizilýde. Sonymen qatar, shaharda álemdik talapqa saı birneshe bes juldyzdy qonaq úı keshenderi boı kótergen. Barlyq nysandardyń qurylystary óndiristik kestege sáıkes júrgizilýde. Tuńǵysh Prezıdent saıabaǵy jasyl jelekke oranyp, ıAsaýı murajaıynyń ishki jumystary júrip jatyr.
Ómirzaq Estaıuly óz kezeginde qurylysqa atsalysyp jatqan sheteldik kompanııa jetekshilerimen kezdesip, jumys barysyndaǵy birqatar ózgeristerdi talqylady.
