Túrkistandaǵy qurylys jumystaryna jergilikti jastar tartylady

TÚRKІSTAN. QazAqparat - Elbasy Nursultan Nazarbaevtyń aǵymdaǵy jyldy «Jastar jyly» dep jarııa etýin Túrkistan oblysynyń jastary tyń serpilispen qabyldady. Olar aıtýly jyl aýqymynda qolǵa alynatyn jańa jobalardy júzege asyrmaq, dep habarlaıdy QazAqparat tilshisi.

Búginde Túrkistan oblysynda jastardyń sany 501 myńnan asady. Onyń ishinde qala jastary 86 myń bolsa, aýyl jastary 415 myńǵa jýyqtaıdy. Óńirde 2 joǵary jáne 66 orta arnaýly oqý ornynda 57 myńnan asa stýdent bilim alady. «Serpin-2050» baǵdarlamasymen 9 313 jas qamtylyp, 2018 jyly atalǵan baǵdarlama aıasynda 440 jas oqýyn bitirdi. Mamandyq alǵan jastardyń 63,3 paıyzy turaqty jumysqa ornalasty. Sondaı-aq, «Jasyl el» baǵdarlamasy boıynsha jyl saıyn 1275 jas eńbekpen qamtylýda. «Dıplommen aýylǵa» jobasy aıasynda 913 jas maman turaqty jumys taýyp, 314 maman baspanaly boldy.

Elbasy Jarlyǵyna sáıkes jastarǵa áleýmettik qoldaý masqatynda bıylǵy jyly aýdan, qalalardaǵy 500-den astam jumyssyz azamatty Túrkistan qalasynda salynyp jatqan qurylys jumystaryna tartý kózdelgen. Olardyń qatarynan «Túrkistan jastar qurylys jasaǵy» qurylyp, merdiger kompanııalarymen kelissózder júrgizilýde.

Aıta keteıik, Jastar jylyna oraı naýryz aıynan bastap jyl sońyna deıin «Aýdan jastarynyń Túrkistanǵa tartýy» atty aptalyǵy uıymdastyrylyp, 1000-nan astam mádenı-sporttyq is-sharalar uıymdastyrylmaq.

Sonymen qatar, bıyl «Túrki jastarynyń kongresin» jáne «Orta Azııa jastarynyń forýmyn» ótkizý kózdelip otyr.