Túrkistandaǵy qurylys jumystary kezinde tabylǵan súıekter qaıta jerlenedi - Bas ımam

TÚRKІSTAN. QazAqparat - Túrkistandaǵy keseneniń mańynan qurylys jumystary kezinde tabylǵan beıitterge qatysty mamandar málimdeme jasady. Óńirlik kommýnıkatsııalar qyzmetinde ótken baspasóz maslıhatynda professor, tarıhshy Haziretáli Tursyn keseneniń tóńiregindegi súıekterdiń shyǵýynyń sebepterin birneshe derektermen túsindirdi, dep habarlaıdy QazAqparat tilshisi.

Onyń aıtýynsha, Túrkistandaǵy eski qalashyqtyń orny 2500 jyldyq mádenı qatpardan turady. Osy bir ótken ǵasyrlarda túrli oqıǵalar oryn alyp, kóne shahardaǵy shaıqastarda qaza tapqandardyń jerlenýi de árqıly bolǵan. Q.A.ıAsaýı kesenesiniń tóńireginde qazaqtyń ıgi-jaqsylarynyń jerlenýi, qazaq handyǵynan 500-600 jyl buryn bastalǵan.

«Birinshiden, qazba jáne qurylys jumystary kezinde tabylyp jatqan qabirler belgili bir ıgi-jaqsylar men tarıhı tulǵalardiki bolýy múmkin. Ondaı jaǵdaıda máıit arýlanyp kómilgen. Ekinshi jaǵdaıda keseneniń tóńireginde Rabat, Shahrıstan sekildi úlken qorǵandar bolǵan. Máselen, Ámir Temirdiń kezinde de shaıqastar oryn alǵan. Tarıhshylar eń sońǵysy Túrkistan qalasynyń polkovnık Verevkınniń otrıadynan qorǵaný kezeńin keltirýde. Osy shaıqasta tóńirekte orlar qazylǵan. Qanshama adam atylǵan. Búginde súıekterdiń shyǵýy, kóz jumǵan adamdardyń arnaıy jerlenbeı betin jaba salýynan deıdi mamandar. Al úshinshi derek boıynsha, 18-19 ǵasyrdaǵy jáne 1931-1932 jyldardaǵy asharshylyqta kesene tóńireginde ólgen adamdardy syrtqa shyǵaryp arnaıy qorymǵa kómilgen», - dedi Haziretáli Tursyn.

Sondaı-aq, baspasóz máslıhatyna qatysqan QMDB qyzmetkerleri tabylǵan máıitterdiń rásim boıynsha qaıta jerlenetinin aıtty.

«Sharıǵat boıynsha qabirstannyń ishine qoıylǵan eń sońǵy adamnyń beıitine 40 jyl ótkennen keıin, mazarat súrilip tastalyp, ornyna qurylys jumystaryn júrgizýge bolady. Al eger, bastalyp ketken qurylys aımaqtarynda atqarylatyn qazba jumystarynda adam súıekteri tabylyp jatsa, ol súıekter aq mataǵa oralyp basqa jerge kómiledi», - deıdi Túrkistan qalasynyń bas ımamy Júsipbek Aıdarbekuly.

Eske salaıyq, buǵan deıin Túrkistandaǵy qurylys jumystary kezinde adamdardyń súıekteri tabylyp jatqany týraly aıtylǵan bolatyn. Olar kese mańy men jańadan salynyp jatqan nysandardyń aýmaǵynda jerdi qazý jumystary kezinde tabylǵan edi.