Túrkistandaǵy qurylys qarqynyn kúsheıtý kerek - Ómirzaq Shókeev

TÚRKІSTAN. QazAqparat - Túrkistan oblysynyń ákimi Ómirzaq Shókeevtiń tóraǵalyq etýimen apparattyq májiliste osyndaı mindet qoıyldy, dep habarlaıdy QazAqparat oblys ákiminiń baspasóz qyzmetine silteme jasap. .

Kún tártibinde áýejaıdyń jáne onda baratyn avtomobıl jolynyń qurylysy men kólik ınfraqurylymynyń jospary, Túrkistan qalasynyń ákimshilik-iskerlik jáne mádenı-rýhanı ortalyǵynda boı kóterip jatqan nysandardyń ornalasýy men jaǵdaıy jáne shahardaǵy ınjenerlik ınfraqurylym júıeleriniń qurylys jumystary, jalpy salynyp jatqan nysandar, sý arnalary týraly sońǵy málimetter talqylandy.

Túrkistannan 16 shaqyrym qashyqtyqta ornalasqan Túrkistan halyqaralyq áýejaıy halyqaralyq standartqa saı jáne zamanaýı qurylys tehnologııasymen salynyp jatyr. Túrik kompanııasy qolǵa alǵan Túrkistan halyqaralyq áýejaı qurylysy 2020 jyly aıaqtalady, dep kútilýde. Іrgetasy qalanǵan jańa nysanda 100-den astam adam tynymsyz eńbek etýde. Týrızm áleýetin arttyrý úshin oblysta arnaıy baǵdarlama ázirlenip, áýejaıdan eki kúnde bir ret Mekkege tikeleı ushaq qatynaıdy.

Qurylys qazany qaınaǵan Túrkistan shaharyndaǵy ákimshilik-iskerlik ortalyǵynda ornalasqan basqarmalar men departamentter ǵımarattary men Kongress-holl, Stadıon, Oqýshylar saraıy, attraktsıondar saıabaǵy sekildi áleýmettik mańyzdaǵy nysandar qala qurylysynyń basym baǵytyna aınalǵan. Sonymen qatar halyqtyń qolaıly ómir súrýin qamtamasyz etý maqsatynda óńirdi abattandyrý nysandaryn ázirleý jumystary júrgizilýde.

«Qurylys qarqynyn kúsheıtý kerek. Eshqandaı kedergiler men sebep- syltaýlarǵa jol joq. Aǵashtardy otyrǵyzý men baptaý máselesi qatań qadaǵalaýda bolsyn. Turǵyn úı qurylysynyń sapasyn jiti baqylap, tezirek paıdalanýǵa berý kerek. Qala ortalyǵyn abattandyrý men kógaldandyrý jumystary baıaý júrip jatyr. Kerek bolsa ár sektor qajetti tehnıka men qosymsha jumys kúshin tartsyn», – dedi oblys ákimi májilis barysynda.

Jınalysta «Arys – Túrkistan» kanalyn qalpyna keltirý men jańa sý arnasyn salý jumystary talqylandy. Bul jobalardy iske asyrý sýarýǵa arnalǵan sýdyń tapshylyǵy máselesin tolyq sheship, aýyl sharýashylyǵy ónimderin óndirýdiń jyl saıynǵy kólemin arttyrady. Aımaq basshysy Túrkistan qalasynyń mańynda «jasyl beldeý» qurý, ırrıgatsııalyq júıeni damytý, kógildir otynmen qamtamasyz etý, jańbyrlatyp sýarý ádisin damytý men azyq-túlik beldeýin qalyptastyrý jumystary boıynsha naqty tapsyrmalar berdi.