Túrkistandaǵy qurylys alańdarynda saqtyq sharalary qatań qadaǵalanýy tıis – Ómirzaq Shókeev

TÚRKІSTAN. QazAqparat – Túrkistan oblysynyń ákimi Ómirzaq Shókeev Túrkistan qalasyndaǵy ákimshilik-iskerlik ortalyǵy aýmaǵynda boı kótergen turǵyn úıler men jańadan salynyp jatqan ǵımarattardyń qurylys barysymen tanysty. Sáýletti nysandar mańyn abattandyrý jumystarynyń barysyn baqylady, dep habarlaıdy QazAqparat tilshisi.

Aımaq basshysy oblys ortalyǵyndaǵy «RIXOS» jáne Hempton qonaq úıleri men Kerýen saraı, kitaphana, Tuńǵysh Prezıdent saıabaǵy men «Áziret-Sultan» qoryq murajaıyndaǵy qurylys alańdaryn aralap kórdi. Mundaǵy qurylys jumystary bir sátke de toqtamaq emes. Bul rette Ómirzaq Shókeev barlyq jumystar ýaqytyly ári sanıtarlyq talapqa saı júrgizilýi tıis dep eskertti. Ómirzaq Estaıuly budan soń qala kóshelerindegi jol jóndeý jumystaryn da tekserdi. Bıylǵy jyly jol ınfraqurylymyn damytý maqsatynda ákimshilik-iskerlik ortalyǵyna irgeles ornalasqan, ıaǵnı ınfraqurylymy tolyq aıaqtalǵan aımaqtarda 106,3 shaqyrymdy quraıtyn 81 kóshege ortasha jóndeý jumystaryn júrgizý josparlanǵan. Qazirgi tańda 58 kóshede jumys qarqyndy júrgizilýde. Oblys ortalyǵynyń damý qarqyny aımaq basshysynyń tikeleı baqylaýynda.